Toshkentda qalbaki dollar bergan holda o‘zganining xonadonini notarial tartibda o‘z nomiga rasmiylashtirib olgan shaxslar ushlandi. Bu haqda IIV JQBB Uyushgan jinoyatchilikka qarshi kurash bo‘limi xabar berdi.
Ma’lum qilinishicha, 2021-yil 5-avgust kuni fuqaro H.T. hamda Abror ismli shaxs fuqaro J.R.ning ishonchiga kirib, unga tegishli bo‘lgan Toshkent shahri “Markaz-5” mavzesida joylashgan xonadonni 40 ming AQSh dollariga sotib olishini va’da qilgan. Ular 4 bog‘lam 100 AQSh dollarlik qalbaki kupyuralarni (39,6 ming dollari qalbaki 400 dollari haqiqiy) bergan holda xonadonni notarial tartibda o‘zining nomiga rasmiylashtirib olgan.
Shu kuni H.T. o‘zining jinoiy harakatlarini davom ettirib, jinoiy sherigi Abror bilan birga J.R.ga berilgan pullar va xonadon hujjatlarini egallash maqsadida uning xonadoniga g‘ayriqonuniy ravishda to‘pponcha bilan qurollangan holda bostirib kirgan. Ular J.R.ni urib, qo‘rqitib, bo‘g‘gan holda berilgan qalbaki pullarni va uy hujjatlarini berishni talab qilib, unga tan jarohati yetkazgan.
Holat yuzasidan noma’lum shaxs Abrorga nisbatan Jinoyat kodeksning 164-moddasi (bosqinchilik) 3-qismi “v” bandi, 168-moddasi (firibgarlik) 4-qismi “a” bandi, 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) 3-qismi “a” bandlari bilan jinoyat ishi qo‘zg‘atilgan.
Surishtiruv ishlari davomida 2021-yilning 17-noyabr kuni IIV JQBB, DXX va Toshkent shahar IIBB JQB xodimlari bilan hamkorlikda o‘tkazilgan tezkor tadbir natijasida Abror ismli shaxs Samarqand viloyati Narpay tumanida yashovchi 26 yoshli fuqaro X.A. ekani aniqlangan. U Toshkent viloyati Toshkent tumanida joylashgan “G‘ishtko‘prik” bojxona postida qo‘lga olingan va IIV VSHga joylashtirilgan.
Mazkur holat yuzasidan surishtiruv ishlarini IIV huzuridagi Tergov departamenti tomonidan olib borilmoqda.
Avvalroq Namanganda qalbaki 10 ming dollarni 6500 dollarga sotmoqchi bo‘lganlar ushlangani, Toshkent viloyatida qalbaki 100 ming so‘mlik kupyuralarni tayyorlash bilan shug‘ullangan oila aniqlangani to‘g‘risida xabar berilgandi.
Izoh (0)