O‘zbekistonda 2021-yilning noyabr oyida aholi o‘rtasida avtomobil oldi-sotdisi bo‘yicha shartnomalar soni oktabrga qaraganda 2,7 foizga kamaydi. Bu haqda Iqtisodiy tadqiqotlar va islohotlar markazi tahlillarida so‘z boradi.
Unga ko‘ra, 2021-yil noyabr oyida respublikada avtomobil oldi-sotdisi bo‘yicha bitimlari soni faollikning o‘sish tendensiyasini saqlab qolgan. Shunday qilib, 2021-yilning oktabr oyiga qadar savdolar biroz pasayganiga (2,7 foiz) qaramay, sentabr oyiga nisbatan o‘sish 29 foizni tashkil etgan.
Shu bilan birga, 2020-yilning noyabr oyiga nisbatan mahalliy avtomobil bozoriga bo‘lgan talab o‘rtacha 8,8 foizga, 2019-yilning shu davriga nisbatan 18,2 foizga keskin o‘sish kuzatilgan.
Markaz ma’lumotlariga ko‘ra, 2021-yil yanvar—noyabr oylarida 7,8 trillion so‘m avtokreditlar berilgan. Bu 2020-yildagi ko‘rsatkichga nisbatan 40 foizga oshgan (2020 yilda 5,6 trillion so‘m). Hududlar kesimida asosiy o‘sish Buxoro viloyati (114 foiz) va Toshkent shahriga (2,4 marta) to‘g‘ri kelmoqda.
Ta’kidlanishicha, birlamchi avtomobil bozorida chiplar bilan bog‘liq vaziyat qiyinligicha qolmoqda. Mikrochiplarning yetishmasligi, uning oqibatlarida mashinalar yetishmovchiligi va uskunalarning o‘zgarishini keltirib chiqaradi. Shu bilan birga, yangi avtomobillar segmenti ortidan ikkilamchi bozorda narxlar oshib boryapti.
Hududlar kesimida eng yuqori o‘sish sur’atlari Qashqadaryo (12,1 foiz), Xorazm (10,5 foiz) viloyatlari va Qoraqalpog‘istonda (6,3 foiz) qayd etilgan. Namangan (17,1 foiz), Farg‘ona (14,9 foiz), Surxondaryo (14,4 foiz) va Navoiy (10 foiz) viloyatlarida avtomobillar xaridi kamaygan.
2021-yil noyabr oyida 17,4 ming dona yangi yengil avtomobillar davlat ro‘yxatidan o‘tkazilgan (oktabr oyiga nisbatan kamayish – 5,9 foiz). Shundan, 1 270 donasi (7,3 foizi) chet elda ishlab chiqarilgan avtomobillar hisoblanadi.
Umuman, yanvar—noyabr oylarida respublika bo‘yicha 169,7 ming dona yangi yengil avtomobillar davlat ro‘yxatidan o‘tkazilgan.
Avvalroq O‘zbekiston 11 oyda xorijdan 503 mln dollarlik avtomobil import qilgani to‘g‘risida xabar berilgandi.
Izoh (0)