Aholi va tadbirkorlik subyektlarining davlat xizmatlaridan foydalanish imkoniyatlari kengaytirilishi munosabati bilan hukumatning ayrim qarorlariga o‘zgartirish va qo‘shimchalar kiritish, shuningdek, ba’zilarini o‘z kuchini yo‘qotgan deb hisoblash to‘g‘risidagi Vazirlar Mahkamasi qarori qabul qilindi.
Kiritilgan o‘zgartishlarga ko‘ra, advokatlik litsenziyasini olishga oid arizalar adliya organlari tomonidan 10 ish kunida ko‘rib chiqiladi (ilgari 20 ish kuni edi).
Shuningdek, vasiylik va homiylik qilishga to‘sqinlik qiluvchi jinoyatlarning aniq ro‘yxati belgilangan (ilgari qasddan sodir etgan jinoyati uchun hukm qilinganlarning barchasiga cheklov mavjud edi).
Endilikda tadbirkorlikni ro‘yxatdan o‘tkazish rad etilganidan 5 ish kunida qayta ro‘yxatdan o‘tkazish uchun murojaat qilinsa, davlat boji to‘lanmaydi.
Tadbirkorlikni ro‘yxatdan o‘tkazish uchun BHMning 20 foizi (54 ming so‘m) miqdorida yig‘im undiriladi (ilgari BHMning 1 baravari — 270 ming so‘m miqdorida undirilgan).
Bundan tashqari, Yagona interaktiv davlat xizmatlari portal ariza berilganda undiriladigan yig‘im miqdori 10 foizga 48,6 ming so‘mga arzonlashadi. Yuridik konsultatsiya bilan shug‘ullanuvchi yuridik firmalarni ro‘yxatdan o‘tkazish soddalashtiriladi. Adliya organlari ro‘yxatdan o‘tayotgan firma tomonidan taqdim etilgan konsultantlar to‘g‘risidagi hujjatlarni uch kun o‘rniga bir kunda ko‘rib chiqishi kerak bo‘ladi.
Davlat boji to‘langanligi uchun qog‘oz kvitansiyani taqdim etish bo‘yicha xizmatlar ko‘rsatish talabi bekor qilinadi. Shuningdek, bir qator xizmatlarni olishda yuridik shaxsning ro‘yxatdan o‘tgani to‘g‘risidagi guvohnoma nusxasi talab qilinmaydi.
Bir qator davlat xizmatlarini ko‘rsatish reglamentiga nogironligi bo‘lgan, ijtimoiy himoya reyestrida ro‘yxatga olingan shaxslar davlat boji va yig‘imlarini 50 foizlik chegirma bilan to‘lashi qayd etilgan tartib qo‘shilgan.
Avvalroq O‘zbekistonda endi sug‘urta shartnomasi elektron shaklda ham tuzilishi mumkinligi, O‘zbekistonda sanatoriylarda davolanish uchun yo‘llanma DXM yoki davlat xizmatlari portali orqali berilishi to‘g‘risida xabar qilingandi.
Izoh (0)