Belarus prezidenti vafot etgan taqdirda, mamlakatning davlat organlari Xavfsizlik kengashi qarorlariga muvofiq harakat qiladi. Bu haqda respublikaning yangi konstitutsiyasi loyihasida aytilgan, deb yozadi “Interfaks”.
Yangi konstitutsiya loyihasida “prezident uning hayotiga suiqasd, terrorchilik harakati, harbiy bosqin yoki boshqa zo‘ravonlik harakatlari natijasida vafot etgan taqdirda” davlat organlari va mansabdor shaxslar Xavfsizlik kengashi qarorlariga muvofiq harakat qilishi qayd etilgan.
Unda ko‘rsatilishicha, bunday vaziyatda Xavfsizlik kengashining yig‘ilishlari Respublika kengashi raisi rahbarligida o‘tkaziladi. Bundan tashqari, prezident vafot etgan taqdirda Xavfsizlik kengashi qarori asosida belgilangan tartibda mamlakat hududida zudlik bilan favqulodda yoki harbiy holat joriy etiladi.
Shuningdek, loyihada prezidentning o‘rni bo‘shab qolgan yoki konstitutsiyada nazarda tutilgan asoslarga ko‘ra o‘z vazifalarini bajarish imkoni bo‘lmagan taqdirda, uning vakolatlari yangi saylangan prezident qasamyod qilgunga qadar Respublika kengashi raisga o‘tishi ko‘zda tutilgan, deyiladi xabarda.
Avvalroq Belarus prezidenti Aleksandr Lukashenko bir-ikki kundan keyin yangi konstitutsiya loyihasi umumxalq muhokamasiga taqdim etilishini aytgandi. Lukashenkoning aytishicha, konstitutsiya o‘zgartiriladigan bo‘lsa, mamlakatdagi boshqaruv tizimi unga muvofiq qayta quriladi.
Belarusda 2020-yil 9-avgustda bo‘lib o‘tgan prezidentlik saylovlaridan keyin boshlangan norozilik namoyishlari fonida Lukashenko konstitutsiyaga o‘zgartirish kiritish zarurati va prezidentlik vakolatlarining bir qismini hokimiyatning boshqa tarmoqlari foydasiga qayta taqsimlashga tayyorligini ma’lum qilgan. Belarusda asosiy qonunning yangi tahriri bo‘yicha referendum 2022-yil fevral oyida bo‘lib o‘tishi xabar qilingandi.
Izoh (0)