Iroq poytaxtida parlament saylovi natijalariga qarshi norozilik namoyishlari bo‘lib o‘tmoqda

Iroq poytaxti Bag‘dodning “Yashil zonasi”da parlament saylovi natijalarini e’lon qilish kutilayotgan fonda norozilik namoyishlari bo‘lib o‘tmoqda. Bu haqda Albawa xabar berdi.

Iroqda 10-oktabrda o‘tkazilgan parlament saylovlari natijalarini qoralash uchun Bag‘doddagi xorijiy va hukumat muassasalari joylashgan “Yashil zona” tashqarisida yuzlab odamlar to‘plandi.

Namoyishchilar soxtalashtirilgani da’vo qilinayotgan saylovlarda go‘yoki o‘g‘irlangan ovozlarni qaytarishga chaqiruvchi bannerlarni ko‘tarib olgan. Mahalliy matbuot xabarlariga ko‘ra, namoyishchilar bir qancha yo‘llarni to‘sib qo‘ygan, shuningdek, “Yashil zona”ga olib boruvchi barcha yo‘llar xavfsizlik kuchlari tomonidan yopilgani ham xabar qilingan.

Iroq hukumati binosi darvozalari oldida namoyishchilar va iroqlik kuchlar o‘rtasida kichik to‘qnashuvlar bo‘lgani xabar qilingan. Guvohlarning so‘zlariga ko‘ra, “Yashil zona” ustida Amerika vertolyoti aylanib yurganini ham ko‘rish mumkin.

Iroqda parlament saylovlari 10-oktabr, yakshanba kuni mamlakatda uzoq vaqtdan beri davom etayotgan siyosiy va iqtisodiy inqiroz fonida bo‘lib o‘tgandi. Ovoz berish natijalari komissiyaning rasmiy veb-saytlarida e’lon qilinadi va ularga bemalol kirish mumkin. Oliy saylov komissiyasi rahbari Adnan Jalil saylov natijalari tasdiqlanmaguncha norasmiy bo‘lib qolishini eslatgan.

Eslatib o‘tamiz, 7-noyabrga o‘tar kechasi Bag‘dodning “Yashil zonasi”da portlovchi modda o‘rnatilgan dron yordamida mamlakat bosh vaziri Mustafo al-Kazimiy qarorgohiga hujum uyushtirilgan edi. Hodisada bosh vazirning shaxsiy xavfsizlik xizmati xodimlaridan olti kishi jarohatlangan. Al-Kazimiyning o‘zi Twitter’da jarohat olmagani haqida yozgan hamda barchani xotirjamlik va vazminlikka chaqirgan.

AQSh prezidenti Jo Bayden Iroqdagi teraktni qoralagan. U al-Kazimiyning qarorgohiga qilingan hujum bo‘yicha tekshiruvga yordam ko‘rsatish bo‘yicha topshiriq bergan.