G‘arbiy Afrikaning Burkina-Faso davlati shimolida qurolli noma’lum shaxslar savdogarlarga tegishli avtomobillar karvoniga hujum qildi. Oqibatda 41 kishi halok bo‘ld, deb yozadi “Korrespondent.net”.
“Burkina-Faso hukumati ushbu vahshiy hujumni keskin qoraladi va qurbonlarning oilalariga hamdardlik bildirdi”, — deyiladi xabarda.
Hozircha hech bir tashkilot sodir bo‘lgan voqea uchun javobgarlikni o‘z zimmasiga olmagan.
Noyabr oyida Burkina-Faso shimolida jangarilar politsiya postiga hujum qilib, 53 kishini o‘ldirgan edi. Voqea munosabati bilan birinchi okrug komandiri va Shimoliy sektor guruhi komandiri o‘z lavozimlaridan ozod etilgan.
Dekabr boshida Malida jangarilar odamlarni mahalliy bozorga olib ketayotgan avtobusni o‘qqa tutishi oqibatida 31 kishi halok bo‘lgandi. Shuningdek, ko‘pchilik jarohat olgan yoki bedarak yo‘qolgan.
Avvalroq Nigeriyada qurolli shaxslarning masjidga qilgan hujumi oqibatida 18 kishi halok bo‘lgani, Efiopiyada noma’lum jangarilarning qishloqqa hujumi natijasida 200 dan ortiq odam vafot etgani haqida xabar berilgandi.
Izoh (0)