Aholi daromadlarini 2 baravar oshirish, ta’limdagi kamchiliklar, ayollarni rahbarlikka tayyorlash, koronavirus — Emomali Rahmon parlamentga murojaat yo‘lladi

21-dekabr kuni Tojikiston prezidenti Emomali Rahmon respublika parlamentiga yillik murojaatini yo‘lladi. Prezident nutqi mamlakatning barcha davlat teleradiokanallari orqali efirga uzatildi. Asia-Plus undan asosiy ma’lumotlarni xabar qildi.

Emomali Rahmon so‘nggi 20 yilda Tojikistonda o‘rtacha yillik iqtisodiy o‘sish 7,5 foiz darajasida ta’minlangani, davlat budjeti daromadlari 252 million somoni (22,3 mln dollar)dan 28 milliard somoni (2,4 mlrd dollar)gacha yetgani haqida gapirdi

Unga ko‘ra, mamlakat yalpi ichki mahsuloti (YaIM) 2000-yildagi 1,8 milliard somoni (159,4 mln dollar)dan 2021-yilda 95 milliard somoni (8,4 mlrd dollar)ga yetgan.

“Boshqacha aytganda, YaIM qariyb 53 barobar, davlat budjeti 111 barobar, aholi jon boshiga YaIM hajmi 30 barobardan ko‘proqqa oshdi”, — dedi davlat rahbari.

Emomali Rahmonning ta’kidlashicha, Tojikiston mustaqilligi davrida 1,4 million oilaga turar joy binolari qurish uchun 138 ming gektar yer maydoni ajratilgan.

“8 million 800 ming nafardan ortiq fuqarolarimiz o‘z turmush sharoitini yaxshilash imkoniyatiga ega bo‘ldi. Eslatib o‘taman, mustaqillik davridan oldingi 70 yilda aholiga atigi 77 ming gektar yer ajratilgan edi”, — dedi prezident.

Shuningdek, u 1991-yilda Tojikistonda 216 ming shaxsiy avtomobil ro‘yxatga olingani, hozir esa bu ko‘rsatkich 2 milliondan oshganini ta’kidladi.

Ish o‘rinlari haqida

Emomali Rahmonning so‘zlariga ko‘ra, Tojikiston mustaqillikka erishganidan beri mamlakatda 3,3 million ish o‘rni yaratilgan.

Davlat rahbari 2022—2026-yillarni sanoatni rivojlantirishning besh yillik davri deb e’lon qildi hamda 500 mingdan ortiq ish o‘rni yaratish, aholi daromadlarini ikki baravar oshirish bo‘yicha ko‘rsatmalar berdi.

Tojikiston aholisi 2022-yilda 10 million, 2026-yilga borib 11 million kishiga yetadi, dedi prezident.

Qishloq xo‘jaligi haqida

Tojikiston prezidenti 2021-yilda sabzavot va meva eksporti o‘tgan yilga nisbatan 70 ming tonnaga ko‘paygani, “lekin bu yetarli emasligini” aytdi.

“Yiliga 1 million tonna qishloq xo‘jaligi mahsulotlarini eksport qilishimiz kerak”, – dedi davlat rahbari.

Shuningdek, u banklarga kredit berish hajmini 2026-yilgacha 30 milliard somoniga (2,6 mlrd dollar) yetkazish bo‘yicha topshiriq berdi.

Ta’lim haqida

Emomali Rahmon o‘z murojaatida ta’lim tizimini, jumladan, maktab va oliy o‘quv yurtlarida xorijiy tillarni o‘qitish usullarini qattiq tanqid qildi.

“Biz o‘zimizni aldayapmiz. Biz uchun ta’lim sifatidan ko‘ra raqamlar muhimroq. Faqat diplom — bir varaq qog‘oz berish bilan shug‘ullanamiz. Miyada esa hech vaqo yo‘q. Biz ta’lim tizimini qayta ko‘rib chiqishimiz kerak”, — dedi prezident.

Shuningdek, Emomali Rahmon 2030-yilgacha ayollarni rahbarlik lavozimlariga tayyorlash, tanlash va tayinlash bo‘yicha Davlat dasturini ishlab chiqish va qabul qilishni buyurdi.

Asia-Plus qayd etishicha, Tojikistonda ayni paytda tibbiyot xodimlarining 68 foizi, ta’lim sohasi xodimlarining 73 foizi, fan xodimlarining 27 foizi ayollardir.

Mamlakat rahbari 2030-yilgacha davlat organlarida ishlaydigan ayollar sonini 30 foizga, rahbar ayollar sonini esa kamida 25 foizga yetkazish uchun shart-sharoit yaratish to‘g‘risida topshiriq berdi.

Koronavirus haqida

“Dunyoning ko‘plab mamlakatlarida koronavirusning yangi to‘lqini kuzatilmoqda. Garchi bizda yangi to‘lqin bo‘lmasa-da, aholi xotirjam bo‘lmasligi kerak. Bu kasallik bilan hazillashmaslik, unga befarq qaramaslik lozim”, — dedi Emomali Rahmon o‘z nutqida.

Davlat rahbari aholini shifokor va mutaxassislarning tavsiyalariga amal qilishga chaqirdi.

“Xorijdan qaytgan fuqarolar shifokorlar nazoratida bo‘lishi kerak. Birinchi navbatda bu ularning oila a’zolari salomatligi uchun muhim. Bugungi kunda mamlakatimizning katta yoshli aholisining 60 foizi emlangan, emlash sur’atini oshirish zarur”, — dedi Tojikiston prezidenti.