Janubiy Koreya KXDR harbiylarining qishki harbiy o‘quv mashg‘ulotlarini diqqat bilan kuzatib bormoqda. Bu haqda “Ryonxap” agentligiga tayanib, “Interfaks” xabar berdi.
“Shimoliy Koreya harbiylari ayni vaqtda qishki o‘quv mashg‘ulotlarini o‘tkazyapti, deb hisoblaymiz”, — deydi Janubiy Koreya Birlashgan shtab boshliqlari qo‘mitasi vakili Kim Chjun Nak.
“Biz Janubiy Koreya va AQShning razvedka organlari bilan yaqin hamkorlikni saqlagan holda tegishli harakatlarni diqqat bilan kuzatib boryapmiz”, — deya qo‘shimcha qiladi u.
Ta’kidlanishicha, Pxenyan an’anaviy ravishda harbiy tayyorgarliklarni dekabr oyida boshlaydi va u bahor boshiga qadar davom etadi.
Avvalroq AQSh KXDR tomonidan ballistik raketalarning ishlab chiqarilishi mintaqadagi vaziyatni beqarorlashtirishini ma’lum qilgani, Janubiy Koreya Kim Chen Inning Koreyalararo urush tugagani haqidagi deklaratsiyani tilga olishini yuqori baholagani, AQSh KXDRga nisbatan dushmanlik niyati yo‘qligini ma’lum qilgani, Shimoliy Koreya suvosti kemasi uchun mo‘ljallangan ballistik raketani sinagan bo‘lishi mumkinligi haqida xabar berilgandi.
Izoh (0)