Amerikalik biznesmen, Tesla va SpaceX asoschisi Ilon Mask o‘zining Twitter’dagi sahifasi orqali 2021-yil yakunlari bo‘yicha 11 milliard dollar soliq to‘lashga tayyorlanayotganini ma’lum qildi, deb xabar beradi Meduza.
13-dekabr kuni, Time jurnali Ilon Maskni yil odami deya e’lon qilganida demokrat-senator Elizabet Uorren Twitter orqali “yil odami rostdan ham soliqlarni to‘lashi va boshqalarning bo‘ynida o‘tirishni bas qilishi uchun” AQShning murakkab soliq qonunchiligini o‘zgartirishga chaqirgandi. Uorren — badavlat amerikaliklar uchun soliqlarni oshirish tarafdori.
Noyabr oyida Mask Twitter ijtimoiy tarmog‘i orqali so‘rovnoma o‘tkazib, o‘ziga tegishli Tesla kompaniyasining 10 foiz aksiyalarini sotish yoki sotmaslik bilan qiziqqandi. U o‘zining bu savolini so‘nggi vaqtlarda “realizatsiya qilinmagan foyda soliq to‘lashdan bo‘yin tovlash vositasi” ekani haqida ko‘p gapirilayotganini bilan izohlagan. So‘rov ishtirokchilarining aksariyati sotuv g‘oyasini qo‘llab-quvvatlagan. Shundan so‘ng, Mask bir necha hafta ichida 14 milliard dollarlik aksiyalarni sotgan.
2021-yilda Ilon Mask Tesla aksiyalarining qimmatlashuvi fonida sayyoraning eng badavlat insoniga aylandi. Noyabr oyida u boyligi 300 milliard dollardan oshgan birinchi inson bo‘ldi. Hozirda Forbes’ning reytingida uning boyligi 237 milliard dollarga, Bloomberg’nikigida esa 243 milliardga baholanmoqda.
Ilon Mask va boshqa ko‘plab badavlat insonlar oddiy amerikaliklarga qaraganda kamroq soliq to‘laydi, chunki ular ko‘pchilik foydalana olmaydigan soliqlardan qochish strategiyasidan foydalanadi. ProPublica notijoriy jurnalistik tashkiloti ma’lumotlariga ko‘ra, Ilon Maskning haqiqiy soliq stavkasi 3,27 foizni tashkil etadi. Yillik daromadi 70 ming dollar bo‘lgan oddiy amerikaliklarniki 14 foiz. Eng past “real stavka” esa Berkshire Hathaway bosh direktori Uorren Baffettda — 0,1 foiz.
Izoh (0)