Namangan viloyatining Yangiqo‘rg‘on tumanida qimorxona tashkil etgan shaxsga jinoyat ishi qo‘zg‘atildi. Bu haqda viloyat IIB matbuot xizmati xabar berdi.
Ma’lum qilinishicha, 7-dekabr kuni soat 19:00 larda, tuman IIB xodimlari 1964-yilda tug‘ilgan fuqaro yashash uyida 3 nafar mahalladoshiga o‘rtaga pul tikib, qimor o‘ynashlari uchun sharoit yaratib bergani va o‘zi ham ular bilan birga qimor o‘ynab, qimorxona tashkil etgani aniqlangan.
Ushbu holat bo‘yicha Yangiqo‘rg‘on tuman IIB huzuridagi TB tomonidan 13-dekabr kuni Jinoyat kodeksining 278-moddasi (qimor va tavakkalchilikka asoslangan boshqa o‘yinlarni tashkil etish hamda o‘tkazish) 1-qismi bilan jinoyat ishi qo‘zg‘atilgan.
Bundan avval Samarqandda ijara uyini qimorxonaga aylantirgan 25 yoshli yigit, Farg‘onada o‘z uyida qimorxona tashkil etgan fuqaro qo‘lga olinib, jinoyat ishi qo‘z‘atilgani haqida xabar berilgan edi. Shuningdek, Samarqandda yashirin kazino tashkil etilgani aniqlanib, bir guruh kishilar ushlangandi.
Izoh (0)