Angrenda ikki yuk poyezdi to‘qnashuvi oqibatida 20 ta vagon ag‘darildi (video)

Ijtimoiy tarmoqlarda Toshkent viloyati Angren shahri hududida poyezd ag‘darilib ketgani aks etgan videolavha tarqaldi. Favqulodda vaziyatlar vazirligi holat bo‘yicha ma’lumot berdi.

Ma’lum qilinishicha, holat 19-dekabr kuni soat 05:03 da Angren shahridan 19 kilometr sharqiy yo‘nalishda joylashgan “O‘zbekko‘mir” AJga qarashli “Angren ko‘mir koni” hududida sodir bo‘lgan. 010-sonli lokomotiv sostav elektrovozning siqilgan havosiz qolishi oqibatida boshqaruvsiz harakatlangan va 1-yo‘lda harakatlanib ketayotgan 017-sonli lokomotiv sostaviga urilgan.

Oqibatda jami 33 ta yuk vagonidan 20 tasi (010-sonli poyezddan 14 ta ko‘mir ortilgan yuk vagon va 017-sonli lokomativ sostavidan 6 ta bo‘sh vagon) temiryo‘l izidan chiqib, ag‘darilgan.

Hodisa oqibatida 010-sonli poyezd mashinisti va uning yordamchisi yengil tan jarohati olgan. Ular “Temir yo‘l transporti” filiali hududidagi tibbiy yordam punktiga olib borilib, tibbiy yordam ko‘rsatilgan va Angren shahar shifoxonasiga yuborilgan.

Mazkur holat oqibatlarini bartaraf etish maqsadida voqea joyiga “O‘zbekko‘mir” AJ tasarrufidagi “Temir yo‘l transport” filialidan 2 ta yuk krani, 2 ta pogruzchik va 50 nafar ishchi-xodim jalb etilgan.

“Bartaraf etish ishlari davom etmoqda. Sodir bo‘lgan holat yuzasidan dastlabki tergovoldi surishtiruv ishlari olib borilmoqda”, — deyiladi xabarda.