“Sharg‘unko‘mir” korxonasi xodimlariga 2,5 mlrd so‘mlik oylik ish haqi to‘lab berilmagani aniqlandi

Ijtimoiy tarmoqda Surxondaryo viloyatida Sariosiyo tumanida joylashgan “Sharg‘unko‘mir” AJ xodimlariga oylik ish haqlari berilmagani aytilgan xabar tarqaldi. Bandlik va mehnat munosabatlari vazirligi holatga munosabat bildirdi.

Xabarda korxonaning oddiy konchisi ekanini aytgan fuqaro og‘ir sharoitda ishlashini, ishchilar bayram puli u yoqda tursin, oylik ish haqlarini ham olmaganini bildirgan. Surxondaryo viloyati Bandlik bosh boshqarmasi Davlat mehnat inspeksiyasi bu bo‘yicha o‘rganish ishlari olib borgan.

Ma’lum bo‘lishicha, haqiqatan ham 15-dekabr holatiga ko‘ra, “Sharg‘unko‘mir” rahbariyati tomonidan xodimlarga 2,5 milliard so‘m miqdordagi oylik ish haqlari to‘lab berilmagani aniqlangan.

Davlat mehnat inspeksiyasi tomonidan “Sharg‘unko‘mir” AJ rahbariyatiga fuqarolarning to‘lanmay qolgan maoshini berish bo‘yicha yozma ko‘rsatma kiritilgan va xodimlarning ish haqini o‘z vaqtida to‘lashda Mehnat kodeksining 154, 161-moddalari talablariga rioya qilish yuzasidan tushuntirish berilgan.

Eslatib o‘tamiz, bu “Sharg‘unko‘mir” korxonasi va uning ishchi xodimlari o‘rtasida tushunmovchilik va norozilik yuzaga kelgan birinchi holat emas. 2019-yilning 14—15-avgust kunlari korxonaning qariyb 200 nafar konchisi ish tashlagan. Norozilik aksiyasiga og‘ir mehnat sharoitlari va korxona rahbariyatining noqonuniy hatti-harakatlari sabab bo‘lgan. Maxsus komissiya norozilik holatlarini atroflicha o‘rganib chiqib, 9 nafar mansabdor shaxs o‘z lavozimidan ozod etilgan.