Самарқанд вилоят ҳокими Эркинжон Турдимов вилоятни ижтимоий-иқтисодий ривожлантириш юзасидан ҳамда 2022 йилги вазифалар борасида халққа мурожаатида мактабларнинг шакли ҳоким ва сектор раҳбарлари жавоб беришини маълум қилди. Бу ҳақда «Дарё» мухбири хабар бермоқда.
«Мен ҳар доим айтадиган гапимни яна такрорламоқчиман. Мактабларнинг шакли ҳоким ва секторларники, улардаги таълимнинг мазмуни эса ҳурматли педагогларимизники. Биз шу мақсадда ишламас эканмиз, олдимизга қўйган марраларимизга эриша олмаймиз. Бунинг учун келажак авлод бизни кечирмайди», — дейди Эркинжон Турдимов.
Ҳокимнинг маълум қилишича, 2020 йилда мактаб битирувчиларининг олий таълим муассасаларига кириш кўрсаткичи бўйича қизил тоифадаги мактаблар сони 142 тани ташкил этган. Бу эса эътирозларга сабаб бўлганди. 2021 йилда қизил тоифадаги мактаблар сони 91 тага камайиб, олий таълимга кириш кўрсатгичи ўтган йилга нисбатдан 2 баробарга кўтарилиб, 24 фоизни ташкил этиб, республикада 5 та поғонага кўтарилган.
«‘Мактаб, мактаб, мактаб’ шиори билан иш юритмасак бўлмайди. Мактабни ёмон қилган сиз билан бизмиз. Нега деган савол туғилади? Фарзандингизни мактабга бердингиз, аммо бир ойда бир марта бормайсиз. Дарсга кириб, ўқитувчидан боламдан сўранг, деб талаб қилса, ўзгариш бўлади. Ота-она боласини дарсларига қизиқмаса, бола баҳо олганига қизиқмаса, қандай ўзгариш бўлади? Биз ҳаммамиз мактаб учун курашишимиз керак. Мактабга бориб нима қиласан, бозорга бор ёки молни боқ десак, нима ўзгаради. Энг катта муаммо ёш авлод ижтимоий тармоққа кириб олганлиги. Енгил-елпи нарсаларга кириб олган. Ёки ўйинларга киради. Охири тобе бўлиб қолади. Ҳаммамиз бирлашмасак, мактабларда ўзгариш бўлмайди. Мактаб ўқитувчиси ёмон деганда ёнида мен ҳам ёмонман, деб турсак, ўзгариш қила оламиз», — дейди Эркинжон Турдимов.
Эслатиб ўтамиз, 2021 йилнинг апрелида Эркинжон Турдимов иштирокида ҳудуддаги мактабгача таълим ташкилотлари фаолиятига бағишланган йиғилиш бўлиб ўтганди. Унда вилоят Мактабгача таълим бошқармаси бошлиғи фаолиятига қониқарсиз баҳо берилган.
Изоҳ (0)