Урганч шаҳри марказида замонавий ерости автомобиль йўли қуриб битказилди. Бу ҳақда Хоразм вилояти ҳокимлиги хабар берди.
Шаҳардаги энг тирбанд ал-Хоразмий ва Ислом Каримов кўчалари ҳудудида қурилган туннелнинг узунлиги 500 метр, кенглиги 17 метрни ташкил этиб, лойиҳа бўйича соатига 3200 та автомобилни ўтказиш қувватига эга.
Янги иншоотнинг очилиш маросимида нуронийлар, ёшлар, давлат ва жамоат ташкилотлари вакиллари иштирок этган. Вилоят ҳокими Фарҳод Эрманов барчани ерости йўл ўтказгичи фойдаланишга топширилиши муносабати билан табриклаган.
Таъкидланишича, бундай ерости автомобиль йўли республика вилоятлари ичида илк бор Хоразмда бунёд этилган. Мазкур йўл ўтказгични барпо қилишда бош пудратчи ташкилот «Кўприкқурилиш трести» УКнинг «14-Кўприкқурилиш» отрядига қарашли 140 та махсус техника ҳамда 1 800 нафардан зиёд малакали муҳандислар, қурувчи ва усталар меҳнат қилган.
«Маълумки, ал-Хоразмий ва Ислом Каримов кўчалари шаҳардаги энг тирбанд йўллардан бўлиб, ал-Хоразмий кўчасида суткасига ўртача 18 минг, Ислом Каримов кўчасида 14 минг дона транспорт воситалари ҳаракатланади. Ерости йўли қурилиши натижасида ушбу чорраҳадаги тирбандлик бартараф этилди, йўл-транспорт ҳодисаларининг олди олиниб, пиёдаларнинг хавфсиз ҳаракатланиши таъминланди», — дейилади хабарда.
Шунингдек, мазкур туннел орқали ҳар куни шаҳар ичи ва шаҳар атрофи йўналишларида қатнайдиган 200 дан ортиқ автобус ва микроавтобуслар ҳаракатланади, ушбу жамоат транспортларида ўртача 30 минг нафар йўловчига хизмат кўрсатилади.
Эслатиб ўтамиз, 2021 йилнинг январида Урганч шаҳрининг марказий майдони янгидан қурилиши тўғрисида хабар берилганди. Майдон марказида 25 метрли Жалолиддин Мангуберди ҳайкали ўрнатилиши, майдон остидан эса автомобиль туннели ўтказилиши айтилганди.
Изоҳ (0)