Buxoro viloyati, Jondor tumani hokimi San’atillo Hikmatov Xalq deputatlari Jondor tumani kengashining 47-sessiyasida tumanda bir guruh ayollar yo‘lni to‘sib qo‘ygani voqeasiga to‘xtalib o‘tdi, deb xabar bermoqda sessiyada ishtirok etgan “Daryo” muxbiri.
“Men bugun ‘Oqtepa’ mahallasida bo‘lib, ayollar bilan gaplashish uchun bordim. Ammo birortasi biz bilan ko‘rishishga chiqmadi. Uyaldi odamlarimiz. Ayollar uch yil oldin biz yo‘lni to‘sdik, ko‘chamizni asfalt qilib berishdi. Endi to‘samiz, tabiiy gaz o‘tkazib berishadi, deyishgan va shu holatni sodir etgan. Mana, fikrlashni ko‘ryapsizmi? Biz bilan uchrashgan erkaklari esa ayollari ulardan so‘ramay, yo‘l to‘sishga chiqishganini bildirishdi. E-e, qaysi o‘zbekning ayoli eridan so‘ramay, yo‘lni to‘sadi, ostonadan chiqmaydi-ku!
Hokim sifatida bizning hududda shunday xunuk holat sodir bo‘lganidan men juda noqulay ahvolda qoldim. Vaholanki, men har biri uchun javobgarman. Kim ham har bir manzilda tabiiy gaz o‘tkazilishini, aholiga qulay bo‘lishini xohlamaydi. Ammo hammasi vaqti-soati bilan o‘rniga tushadi, birdaniga emas”, — dedi u.
Ma’lumotga ko‘ra, bugungi kunda tumanda 177,5 ming aholi mavjud bo‘lib, 79 736 nafari yoshlardan iborat. Hokim tumanda yoshlarga oid davlat siyosatini tubdan o‘zgartirish borasida talay ishlar rejalashtirilgani, shunga qaramay, yoshlarning bo‘sh vaqtini samarali amalga oshirish bo‘yicha ishlar juda qoniqarsiz ekanligini aytib o‘tdi.
“Tumanda 51 ta umumiy o‘rta ta’lim maktabi bo‘lib, faqat 8 tasida sport zal yo‘q. Biroq bu sportzallar yetarli darajada ishlayaptimi? Ulardan yoshlarimiz foydalana olishyaptimi? Maktabga borsa, maktabni qulflab ketishadi. Kasb-hunar kollejiga borsa, u qulflangan. Bugun Jondorda madaniy hordiq chiqaradigan obyektlarimiz bormi? Bitta kinoklub yo‘q, konsert tashkil qiladigan zallarimiz yo‘q. Qayerga boradi yoshlar?” — dedi hokim.
Ma’lum qilinishicha, “yoshlar daftari”ga kiritilganlarga o‘z-o‘zini band qilishi uchun 1 milliard 445,7 million so‘m miqdorda subsidiya ajratilgan. 515 nafar yoshlar jamoat ishlariga jalb qilinib, ularga 3,5 milliard so‘m to‘lab berilgan. Bulardan tashqari, 2084 nafar ishsizlar doimiy ishga joylashtirilgan. 220 ta xonadonga uylar qurib berilgan.
“Bugun qaysidir sohalarda murojaatlar kamaygandir, lekin tugamadi. Odamlarning muammolari yetarlicha yechilmadi. Ularning talabidan kelib chiqib, o‘rganganimizda tumanimizda yana 400 dan ortiq xonadonning farovon yashashi uchun asqatadigan ko‘p qavatli uylar qurishimiz kerak ekan. Bu, albatta, juda katta harakat va xarajat talab qiladi.
Ayni paytda yuqorida qayd etilgan 2084 nafar shaxsning ishga joylashtirilgani mavjud 10440 nafar ishsizlar ro‘yxati oldida juda ojiz raqam. 6400 nafar fuqaroning esa turli xorij davlatlarida ishlash uchun ketgani yana bir og‘riqli jihatimiz. Odamlarimizning chet ellarda sarson bo‘lib yurishganidan vijdonim qiynaladi, og‘rinaman. Har yili kamida 1000-1500 nafar fuqarolarimizni olib kelib, o‘zimizda ishlatishimiz kerak. Birlashsak, birgalashsak, ko‘p natijalarga erisha olamiz. Kimdir yo‘lni to‘sib qo‘ysa, yana kimdir bu yerda ishlash og‘ir, deb turli xorij davlatlariga qarab yugursa... birgina hokimning o‘zi nima qila olardi?”, — dedi Jondor tumani hokimi.
Ma’lumot uchun, hokim tilga olgan Buxoro viloyati Jondor tumanidagi voqea 4-dekabr kuni yuz bergan. “Romish” MFY hamda “Oqtepa” MFYlar hududida istiqomat qiluvchi aholi “Oqtepa” MFY hududidan o‘tuvchi Gazli—Kogon yo‘nalishi bo‘yicha yangidan qurilayotgan yuqori bosimli magistral gaz quvuri qurilish ishlari olib borilayotgani tufayli, ushbu qurilayotgan magistral gaz quvuridan tabiiy gaz ulab berilishini talab qilib mazkur hududdan o‘tuvchi yo‘l yoqasiga yig‘ilgan.
Voqeadan bir kun o‘tib holat aks etgan video ijtimoiy tarmoqlarda tarqaldi. Unda ayollar gaz va “svet” yo‘qligi sabab avtomobil yo‘lini to‘sib qo‘ygani aytilgan. Shu kuni tuman hokimligi bunga munosabat bildirib, aholining gaz elektr ta’minoti bo‘yicha iddaolari mutlaqo asossiz ekanini ma’lum qildi.
Eslatib o‘tamiz, 2021-yilning iyulida Buxoro viloyatining G‘ijduvon tumanida kredit ololmagani bois avtomobil yo‘lini to‘sgan ayollarning to‘rt nafariga ma’muriy qamoq jazosi tayinlanib, salkam 15 million so‘mdan jarimaga tortilgandi.
Izoh (0)