Бухоро вилояти, Жондор тумани ҳокими Санъатилло Ҳикматов Халқ депутатлари Жондор тумани кенгашининг 47-сессиясида туманда бир гуруҳ аёллар йўлни тўсиб қўйгани воқеасига тўхталиб ўтди, деб хабар бермоқда сессияда иштирок этган «Дарё» мухбири.
«Мен бугун ‘Оқтепа’ маҳалласида бўлиб, аёллар билан гаплашиш учун бордим. Аммо бирортаси биз билан кўришишга чиқмади. Уялди одамларимиз. Аёллар уч йил олдин биз йўлни тўсдик, кўчамизни асфальт қилиб беришди. Энди тўсамиз, табиий газ ўтказиб беришади, дейишган ва шу ҳолатни содир этган. Мана, фикрлашни кўряпсизми? Биз билан учрашган эркаклари эса аёллари улардан сўрамай, йўл тўсишга чиқишганини билдиришди. Э-э, қайси ўзбекнинг аёли эридан сўрамай, йўлни тўсади, остонадан чиқмайди-ку!
Ҳоким сифатида бизнинг ҳудудда шундай хунук ҳолат содир бўлганидан мен жуда ноқулай аҳволда қолдим. Ваҳоланки, мен ҳар бири учун жавобгарман. Ким ҳам ҳар бир манзилда табиий газ ўтказилишини, аҳолига қулай бўлишини хоҳламайди. Аммо ҳаммаси вақти-соати билан ўрнига тушади, бирданига эмас», — деди у.
Маълумотга кўра, бугунги кунда туманда 177,5 минг аҳоли мавжуд бўлиб, 79 736 нафари ёшлардан иборат. Ҳоким туманда ёшларга оид давлат сиёсатини тубдан ўзгартириш борасида талай ишлар режалаштирилгани, шунга қарамай, ёшларнинг бўш вақтини самарали амалга ошириш бўйича ишлар жуда қониқарсиз эканлигини айтиб ўтди.
«Туманда 51 та умумий ўрта таълим мактаби бўлиб, фақат 8 тасида спорт зал йўқ. Бироқ бу спортзаллар етарли даражада ишлаяптими? Улардан ёшларимиз фойдалана олишяптими? Мактабга борса, мактабни қулфлаб кетишади. Касб-ҳунар коллежига борса, у қулфланган. Бугун Жондорда маданий ҳордиқ чиқарадиган объектларимиз борми? Битта киноклуб йўқ, концерт ташкил қиладиган залларимиз йўқ. Қаерга боради ёшлар?» — деди ҳоким.
Маълум қилинишича, «ёшлар дафтари»га киритилганларга ўз-ўзини банд қилиши учун 1 миллиард 445,7 миллион сўм миқдорда субсидия ажратилган. 515 нафар ёшлар жамоат ишларига жалб қилиниб, уларга 3,5 миллиард сўм тўлаб берилган. Булардан ташқари, 2084 нафар ишсизлар доимий ишга жойлаштирилган. 220 та хонадонга уйлар қуриб берилган.
«Бугун қайсидир соҳаларда мурожаатлар камайгандир, лекин тугамади. Одамларнинг муаммолари етарлича ечилмади. Уларнинг талабидан келиб чиқиб, ўрганганимизда туманимизда яна 400 дан ортиқ хонадоннинг фаровон яшаши учун асқатадиган кўп қаватли уйлар қуришимиз керак экан. Бу, албатта, жуда катта ҳаракат ва харажат талаб қилади.
Айни пайтда юқорида қайд этилган 2084 нафар шахснинг ишга жойлаштирилгани мавжуд 10440 нафар ишсизлар рўйхати олдида жуда ожиз рақам. 6400 нафар фуқаронинг эса турли хориж давлатларида ишлаш учун кетгани яна бир оғриқли жиҳатимиз. Одамларимизнинг чет элларда сарсон бўлиб юришганидан виждоним қийналади, оғринаман. Ҳар йили камида 1000-1500 нафар фуқароларимизни олиб келиб, ўзимизда ишлатишимиз керак. Бирлашсак, биргалашсак, кўп натижаларга эриша оламиз. Кимдир йўлни тўсиб қўйса, яна кимдир бу ерда ишлаш оғир, деб турли хориж давлатларига қараб югурса... биргина ҳокимнинг ўзи нима қила оларди?», — деди Жондор тумани ҳокими.
Маълумот учун, ҳоким тилга олган Бухоро вилояти Жондор туманидаги воқеа 4 декабрь куни юз берган. «Ромиш» МФЙ ҳамда «Оқтепа» МФЙлар ҳудудида истиқомат қилувчи аҳоли «Оқтепа» МФЙ ҳудудидан ўтувчи Газли—Когон йўналиши бўйича янгидан қурилаётган юқори босимли магистрал газ қувури қурилиш ишлари олиб борилаётгани туфайли, ушбу қурилаётган магистрал газ қувуридан табиий газ улаб берилишини талаб қилиб мазкур ҳудуддан ўтувчи йўл ёқасига йиғилган.
Воқеадан бир кун ўтиб ҳолат акс этган видео ижтимоий тармоқларда тарқалди. Унда аёллар газ ва «свет» йўқлиги сабаб автомобиль йўлини тўсиб қўйгани айтилган. Шу куни туман ҳокимлиги бунга муносабат билдириб, аҳолининг газ электр таъминоти бўйича иддаолари мутлақо асоссиз эканини маълум қилди.
Эслатиб ўтамиз, 2021 йилнинг июлида Бухоро вилоятининг Ғиждувон туманида кредит ололмагани боис автомобиль йўлини тўсган аёлларнинг тўрт нафарига маъмурий қамоқ жазоси тайинланиб, салкам 15 миллион сўмдан жаримага тортилганди.
Изоҳ (0)