Buxoro viloyatining G‘ijduvon tumanida kredit ololmagani bois avtomobil yo‘lini to‘sgan ayollarning to‘rt nafari ma’muriy qamoq jazosini olib, salkam 15 million so‘mdan jarimaga tortildi. Bu haqda “Daryo” muxbiri xabar berdi.

Foto: IIV matbuot xizmati

Ta’kidlanishicha, kredit ololmagani sabab avtomobil yo‘lini to‘sgan ayollar ishini 2021-yilning 16-iyul kuni Jinoyat ishlari bo‘yicha G‘ijduvon tuman sudi ko‘rib chiqqan.

Qayd etilishicha, g‘ijduvonlik “Marjona G‘uncha” mas’uliyati cheklangan jamiyati rahbari 43 yoshli M.I. 2021-yilning 15-iyul kuni bir nechta ayollar bilan, taxminan, soat 18:30 da G‘ijduvon tumanidan o‘tuvchi xalqaro ahamiyatga ega M-37 avtomagistral yo‘liga chiqib, avtomashinalar harakatini to‘sib qo‘ygan va ko‘chada yurish yoki namoyishlar uyushtirish tartibini, fuqarolar tinchligi va osoyishtaligini buzib, jamiyatda yurish-turish qoidalarini mensimasdan, mayda bezorilik sodir qilgan.

Foto: IIV matbuot xizmati

M.I. sud jarayonida bu harakatini izohlab, tanishlari — F.P., D.S., M.A., M.Q., D.Ya. bilan birgalikda yo‘lni to‘sishga majbur bo‘lganini bildirgan. Shuningdek, 19 yoshli o‘g‘li A.H.ga ham oldindan qo‘ng‘iroq qilib, yo‘lni to‘sishga chiqayotganini aytgan.

Sudda so‘z olgan tadbirkor ayolning o‘g‘li shu kuni, taxminan,  soat 16:00 da onasi unga qo‘ng‘iroq qilib, ko‘chaga chaqirganini va notanish blogerga intervyu berganini, tanishlari bilan magistral yo‘lni to‘smoqchi bo‘lishayotganini aytganini bildirdi.

Aytilishicha, onasi bilan telefon orqali gaplashgan o‘g‘il avtomashinasida voqea joyiga yetib borgan. Va u yerda onasi va qo‘shnilari yo‘lni to‘sib olganini, notanish bloger hodisani tasvirga tushirayotganini ko‘rib, fuqaro Q.K.ning qo‘lidan ushlaganini, shu paytda blogerning qo‘l telefoni singanini bayon qildi.

Huquqbuzarlar sudda o‘z aybiga to‘liq iqrorlik bildirib, qilmishidan pushaymonligini, bunday holat qaytib takrorlanmasligini bayon qilgan va qonuniy yengillik so‘ragan.

Sud tadbirkor ayol M.I.ni Ma’muriy javobgarlik to‘g‘risidagi kodeksning 183-moddasi (mayda bezorilik) va 201-moddasi (yig‘ilishlar, mitinglar, ko‘cha yurishlari yoki namoyishlar uyushtirish, o‘tkazish tartibini buzish) bilan ayblab, unga 11 sutka ma’muriy qamoq hamda bazaviy hisoblash miqdorining 60 baravari, ya’ni 14 million 700 ming so‘m jarima tayinlagan.

Shuningdek, F.P., D.Ya. va M.Q. ham shu moddalar bilan ayblanib, F.D. va D.Ya. 10 sutka, M.Q. esa 8 sutka ma’muriy qamoq hamda 14 million 700 ming so‘m jarimaga tortilgan.

D.S. esa Ma’muriy javobgarlik to‘g‘risidagi kodeksning 34-moddasi (bir nechta huquqbuzarlikni sodir etganlik uchun ma’muriy jazo qo‘llanish)ga asosan 8 sutka ma’muriy qamoq jazosi tayinlangan va undan qamoqda bo‘lgan vaqti uchun 294 ming so‘m xarajatlar undirilishi belgilangan.

75 yoshli M.A.ga nisbatan ham Ma’muriy javobgarlik to‘g‘risidagi kodeksning 183-moddasi (mayda bezorilik) qo‘llanilib, bazaviy hisoblash miqdorining uch baravari miqdorida, ya’ni 735 ming so‘m jarima hamda 201-moddaning 1-qismi (yig‘ilishlar, mitinglar, ko‘cha yurishlari yoki namoyishlar uyushtirish, o‘tkazish tartibini buzish) bilan mazkur kodeksning 33-moddasi (yengilroq jazo chorasining qo‘llanilishi) asosida bazaviy hisoblash miqdorining 20 baravari miqdorida, ya’ni 4 million 900 ming so‘m jarima jazosi tayinlangan.

Qo‘shimcha qilinishicha, telefoni singan bloger foydasiga tadbirkorning o‘g‘lidan 300 ming so‘m zarar undirilishi ham belgilangan. Va o‘g‘ilga 15 sutka ma’muriy qamoq jazosi tayinlanib, qamoqda bo‘lgan vaqti uchun 551 ming 250 so‘m xarajatlar undirilishi qayd etilgan.