Ijtimoiy tarmoqlarda Qashqadaryo viloyatining Chiroqchi tumanidagi “Xo‘ja Abdujabbor” qishlog‘ida yer cho‘g‘ bo‘lib yonayotgani aytilgan video tarqaldi. Viloyat Ekologiya boshqarmasi mazkur holatga munosabat bildirib, cho‘g‘ yer ostida qolib ketgan qamishlar qizishi va chirishi natijasida yuzaga kelganini ma’lum qildi.
Ma’lum qilinishicha, Chiroqchidagi “Xo‘ja Abdujabbor” qishlog‘i hududida joylashgan yerdan chiqayotgan tutun tuman nazorat inspeksiyasi inspektorlari, tuman favqulodda vaziyatlar bo‘limi, “Hududgaz ta’minot” tuman filiali xodimlari tomonidan o‘rganilgan. O‘rganish jarayonida taxminan 10 sotix yer maydon avval yonib o‘chgani va hozirda kunda taxminan shuncha maydon ustidan tutun chiqib, atrofga badbo‘y hid tarqatayotgani kuzatilgan.
O‘rganish davomida ushbu qishloqda yashovchi oqsoqollar bu joy taxminan 50-70 yillar oldin chuqurlik va qamishzor bo‘lganini, yillar o‘tib qamishlar ustiga tuproq yopilib ketganini ta’kidlagan.
Ushbu holat bo‘yicha Geologiya sohasi mutaxassislarining o‘rganish o‘tkazib xulosalari taqdim qilingunga qadar, dastlabki xulosa yer ostidagi qolib ketgan qamishlar qizishi va chirishi natijasida ushbu holat yuzaga kelgani bo‘yicha dastlabki xulosa qilingan.
Izoh (0)