Qarshi shahridagi “Shodlik” mahallasida joylashgan 2-sonli yotoqxona xaroba ahvolda ekani, viloyat va shahar hokimligi holatga e’tibor qaratmayotgani xabar berilgandi. Shundan so‘ng viloyat hokimligi mazkur shikoyatga e’tibor qaratib, yotoqxona tadbirkorga tegishli mulk ekanini yozdi va tadbirkorlik subyektida davlat mablag‘lari hisobidan ta’mirlash ishlarini olib borish qonunga zid ekanini ta’kidladi.
“Daryo” muxbirining xabar berishicha, 2021-yilning 13—14-dekabr kunlari mazkur yotoqxonada homiylar hisobidan ta’mirlash ishlari boshlab yuborilgan.
“Yotoqxonada yashayotgan fuqarolarni sovuq ob-havoda ko‘chada qoldirib bo‘lmasligini hisobga olib, homiy tadbirkor va rahbarlarni jalb qilgan holda yotoqxonani ta’mirlab, fuqarolarga shart-sharoit yaratib berishni maqsad qildik. Ammo esdan chiqarmaslik kerakki, mazkur yotoqxona xususiy mulk, shu sababli yotoqxonani budjetdan mablag‘ ajratib ta’mirlab bo‘lmaydi. Qolaversa, yotoqxonada yashovchilarga mahalliy hokimliklar tomonidan imkoniyat yaratib berilgach, ular bu yotoqxonani tark etadi. Ularga uy-joy qilingunga qadar esa biz imkoniyat yaratib berishga qaror qildik”, — deydi “Daryo” muxbiri bilan suhbatlashgan Qarshi shahar hokimi Normo‘min Xolboyev.
Shahar hokimining taxminiy hisob-kitoblariga ko‘ra, mazkur yotoqxona ta’miriga 200-300 million so‘m mablag‘ sarflanishi mumkin.
“Mablag‘ homiylar hisobidan bo‘lgani bois, biz ta’mir uchun sarflanayotgan mablag‘ning aniq summasini aytolmaymiz. Kimdir bo‘yoq olib kelgan, yana kimdir deraza romlarini olib kelib, chin ko‘ngildan saxovat qilmoqda”, — dedi Normo‘min Xolboyev.
Qarshi shahar hokimining tan olishicha, mazkur yotoqxona muammosi 2020-yil karantin paytida ham kun mavzusiga aylangan bo‘lib, o‘sha paytdagi viloyatning sobiq hokimi Zoir Mirzayev tomonidan shahar va tuman hokimlariga hududlardan kelib yotoqxonada qo‘nim topgan fuqarolarni o‘z joyiga qaytarib, ularning boshpanali bo‘lishi uchun zarur yordam ko‘rsatilishi kerakligi, shuningdek hokimlarga boshpanasiz fuqarolarni “viloyat hokimligidan yordam beriladi”, deya Qarshi shahriga jo‘natavermaslik lozimligi haqida topshiriq berilgan. Biroq bu topshiriq shunchaki aytilgan va o‘sha joyida qolgan.
Qarshi shahar hokimining qo‘shimcha qilishicha, ta’mirlash davomida yotoqxonaning isitish tizimi, kanalizatsiya muammosi va ichimlik suvi bilan bog‘liq muammolari ham hal etilib, yotoqxona oldida bolalar maydonchasi barpo etiladi.
“Daryo” muxbirining aniqlashtirishicha, viloyatning ayni kundagi hokimi Murodjon Azimov ham xuddi Zoir Mirzayev kabi dastlab yotoqxonadagi fuqarolarni shahar va tuman hokimlari yordamida boshpanali qilishni maqsad qilgan va Qarshi, Qamashi, Kasbi, Koson va Nishon tumani hokimlariga bu haqda topshiriq bergan.
“Daryo” muxbiri viloyatning sobiq hokimi Zoir Mirzayevning topshirig‘i o‘z vaqtida bajarilmagani sababi hamda amalda hokim topshirig‘i qay darajada ado etilayotganini bilish maqsadida mas’ullar bilan muloqot qilishga urindi. Qamashi tumani hokimligi axborot xizmati rahbari Nurbek Rasulov muxbirning viloyatning sobiq hokimi topshirig‘i bajarilmagani sababi va ayni kunda viloyatga rahbarlik qilayotgan Murodjon Azimovning topshirig‘i qay darajada bajarilayotganini oydinlashtirishga oid savolini ochiq qoldirgan bo‘lsa, Nishon tumani hokimligi axborot xizmati mas’uli xaroba yotoqxonada nishonlik fuqarolar yo‘qligini bildirdi.
Bu haqda “Daryo” muxbiri bilan muloqot qilgan Kasbi tumani hokimligi axborot xizmati rahbari Gulilaylo Tugalova esa hokim To‘xtamurod Meyliyev aslida kasbilik bo‘lgan ikki nafar ayol bilan Zoir Mirzayev topshiriq bergan paytdayoq suhbatlashib, ularni Kasbi tumaniga qaytarish va uy-joy bilan ta’minlash chorasini ko‘rganini aytmoqda.
“Ammo har ikki ayol ham hokimga Kasbi tumaniga qaytmasligini aytib, taklifni rad etgan”, — deydi Gulilaylo Tugalova.
Kasbi tumani hokimligining matbuot kotibi Gulilaylo Tugalovaga ko‘ra, viloyatning amaldagi hokimi Murodjon Azimov tomonidan berilgan topshiriqdan so‘ng bu masala yana kun tartibiga chiqqan. Va kasbilik mas’ullar ikki nafar ayolni tumanga qaytarish maqsadida yana ular bilan suhbatlashgan.
Aniqlanishicha, ayni kunda mazkur yotoqxonadagi 62 ta xonada 158 nafar fuqaro istiqomat qiladi.
Eslatib o‘tamiz, avvalroq mazkur yotoqxona ahvoli jamoatchilikka oshkor bo‘lib, odamlarni tashvishga solgach, viloyat hokimligi axborot xizmati mas’ullari holatga e’tibor qaratgan. “Tez kunlarda kim uy-joyga muhtoj, kimning uy-joyi borligi o‘rganilib, har biri bo‘yicha oxirgi xulosalar beriladi. Shunga qarab binoda yashab kelayotgan uy-joyi bo‘lmagan fuqarolarni kelgusida turar joylar bilan ta’minlash choralari ko‘riladi. Tumanlardan kelib binoga joylashib olgan fuqarolar avvalgi yashash manzillariga qaytariladi. Barcha fuqarolar muammosi tegishli tartibda hal etilganidan so‘ng bino tadbirkorga bo‘shatib beriladi”, — degandi.
Izoh (0)