Samarqand viloyatida mast holatda bir qancha qonunbuzarlik holatlarini sodir etgan 32 yoshli erkak qo‘lga olindi. Bu haqda Tergov departamenti xabar qildi.
Ma’lum qilinishicha, Samarqand tumanida 10-dekabr kuni N.F. (1998-yilda tug‘ilgan) tuman IIBga ariza bilan murojaat qilgan. Shu kuni soat 04:40 atrofida noma’lum shaxs hech kim yo‘qligidan foydalanib “Oqmachit” mahallasida joylashgan oziq-ovqat savdo do‘koniga kirish eshigini sindirish yo‘li bilan kirgan. N.F.ning ma’lumotiga ko‘ra, do‘kon ichidagi 210 ming so‘mlik 6 kilogramm sarimsoq piyoz hamda 100 ming so‘m turadigan bir dona temir seyfini yashirin ravishda talon-toroj qilingan. Fuqaro talonchilik qilgan shaxsga nisbatan qonuniy chora ko‘rilishini so‘ragan.
Bundan tashqari, 10-dekabr kuni yana bir necha fuqaro tuman IIBga ariza bilan murojaat qilib, shu kuni soat 04:00 dan to 04:30 ga qadar noma’lum shaxs “Oqmachit” mahallasida joylashgan “Shourma” do‘konining bahosi 50 ming so‘m turadigan eshik oynasini, “Optovik.uz” savdo majmuasining bahosi 550 ming so‘m turadigan ikki dona deraza oynasini hamda “Agrobank” Samarqand filialiga qarashli 43 million so‘mlik “Humo” bankomatini sindirib ketganini bildirgan.
Olib borilgan tezkor harakatlar natijasida yuqorida ko‘rsatilgan holatlarning barchasini Samarqand viloyati Payariq tumanida yashovchi B.Y. (1989-yilda tug‘ilgan) sodir etgani aniqlangan.
U o‘zi ishlaydigan avtomashinalarni yuvish shoxobchasiga bormoqchi bo‘lib, yo‘lda adashib qolganini, oshxonalardan birida spirtli ichimlik ichib, so‘ng yuqoridagi qonunbuzarliklarni sodir etganini ma’lum qilgan.
Holatlar yuzasidan unga nisbatan Jinoyat kodeksning 169-moddasi 2-qismi “g” bandi (o‘g‘irlik) bilan jinoyat ishi qo‘zg‘atilgan.
Avvalroq Samarqandda yanvar–oktabr oylarida bosqinchilik, talonchilik, o‘g‘irlik, firibgarlik va bezorilik jinoyatlari soni oshgani xabar qilingandi. 2021-yilning dastlabki 10 oyida hududda qayd etilgan jami jinoyatlar soni 1830 taga (3487/5317), jinoyat qidiruv sohasidagi jinoyatlar 1291 taga (1908/3199) ko‘paygan.
Mavzuga doir:
Izoh (0)