Самарқанд вилоятида маст ҳолатда бир қанча қонунбузарлик ҳолатларини содир этган 32 ёшли эркак қўлга олинди. Бу ҳақда Тергов департаменти хабар қилди.
Маълум қилинишича, Самарқанд туманида 10 декабрь куни Н.Ф. (1998 йилда туғилган) туман ИИБга ариза билан мурожаат қилган. Шу куни соат 04:40 атрофида номаълум шахс ҳеч ким йўқлигидан фойдаланиб «Оқмачит» маҳалласида жойлашган озиқ-овқат савдо дўконига кириш эшигини синдириш йўли билан кирган. Н.Ф.нинг маълумотига кўра, дўкон ичидаги 210 минг сўмлик 6 килограмм саримсоқ пиёз ҳамда 100 минг сўм турадиган бир дона темир сейфини яширин равишда талон-торож қилинган. Фуқаро талончилик қилган шахсга нисбатан қонуний чора кўрилишини сўраган.
Бундан ташқари, 10 декабрь куни яна бир неча фуқаро туман ИИБга ариза билан мурожаат қилиб, шу куни соат 04:00 дан то 04:30 га қадар номаълум шахс «Оқмачит» маҳалласида жойлашган «Шоурма» дўконининг баҳоси 50 минг сўм турадиган эшик ойнасини, «Optovik.uz» савдо мажмуасининг баҳоси 550 минг сўм турадиган икки дона дераза ойнасини ҳамда «Agrobank» Самарқанд филиалига қарашли 43 миллион сўмлик «Humo» банкоматини синдириб кетганини билдирган.
Олиб борилган тезкор ҳаракатлар натижасида юқорида кўрсатилган ҳолатларнинг барчасини Самарқанд вилояти Пайариқ туманида яшовчи Б.Й. (1989 йилда туғилган) содир этгани аниқланган.
У ўзи ишлайдиган автомашиналарни ювиш шохобчасига бормоқчи бўлиб, йўлда адашиб қолганини, ошхоналардан бирида спиртли ичимлик ичиб, сўнг юқоридаги қонунбузарликларни содир этганини маълум қилган.
Ҳолатлар юзасидан унга нисбатан Жиноят кодекснинг 169-моддаси 2-қисми «г» банди (ўғирлик) билан жиноят иши қўзғатилган.
Аввалроқ Самарқандда январь–октябрь ойларида босқинчилик, талончилик, ўғирлик, фирибгарлик ва безорилик жиноятлари сони ошгани хабар қилинганди. 2021 йилнинг дастлабки 10 ойида ҳудудда қайд этилган жами жиноятлар сони 1830 тага (3487/5317), жиноят қидирув соҳасидаги жиноятлар 1291 тага (1908/3199) кўпайган.
Мавзуга доир:
Изоҳ (0)