Ўзбекистонда куз-қиш мавсумига етарли даражада тайёр бўлмаган 931 та хусусий боғча вақтинчалик ёпилган

Ўзбекистондаги 931 та нодавлат болалар боғчаси куз-қиш мавсумига тайёргарлиги етарли даражада бўлмагани сабабли ўз фаолиятини вақтинчалик тўхтатган. Бу ҳақда 15 декабрь куни ўтказилган брифингда Мактабгача таълим вазирлиги ахборот хизмати раҳбари Мавлуда Асқархўжаева маълум қилди.

Унинг айтишича, мактабгача таълим вазирининг 23 сентябрдаги буйруғига асосан ишчи гуруҳ тузилиб, жойларда 2021—2022 йиллар куз-қиш мавсумида барқарор ишлашга тайёрлаш бўйича тегишли назорат ишлари олиб борилди.

Ишчи гуруҳ томонидан ўрганилган маълумотларга кўра, нодавлат мактабгача таълим ташкилотларининг (давлат хусусий шерикчилик, оилавий мактабгача таълим ташкилоти) умумий ҳисобда 931 таси куз-қиш мавсумига тайёргарлиги етарли даражада бўлмагани сабабли вақтинчалик ўз фаолиятини тўхтатган.

Уларнинг сони  ҳудудлар кесимида қуйидагича:

• Қорақалпоғистон Республикасида — 76 та,
• Хоразм вилоятида — 110 та
• Андижон вилоятида — 20 та,
• Бухоро вилоятида — 63 та,
• Жиззах вилоятида — 54 та,
• Қашқадарё вилоятида — 88 та,
• Навоий вилоятида — 83 та,
• Наманган вилоятида — 85 та,
• Фарғона вилоятида — 125 та,
• Самарқанд вилоятида — 97 та,
• Сурхондарё вилоятида — 94 та,
• Сирдарё вилоятида — 26 та,
• Тошкент вилоятида — 10 та.