La Ligani sudga bergan “Real” va “Barselona”, JCh yarim finalchisidan revansh olgan O‘zbekiston futzal terma jamoasi va bekor bo‘lish arafasida turgan Afrika Kubogi. Eng so‘nggi sport yangiliklari

Dunyo va o‘zbek sportiga oid 15-dekabrning eng muhim xabarlari dayjesti bilan tanishing.

O‘zbekiston

Temur Kapadze qo‘l ostidagi O‘zbekiston olimpiya terma jamoasi 15—28-dekabr kunlari Toshkent va Antaliya (Turkiya) shaharlarida yig‘in o‘tkazadi. Kapadze yig‘inga jalb etilgan futbolchilarning yakuniy ro‘yxatini e’lon qildi.

Tarkibdan 27 nafar o‘yinchi o‘rin oldi, ularning 17 nafari “Olimpik” klubi vakillari bo‘ldi.

O‘zbekiston futzal terma jamoasi Qozog‘istonga qarshi ikkinchi o‘yinda g‘alaba qozondi

Futzal bo‘yicha O‘zbekiston milliy terma jamoasi Qozog‘istonga qarshi kechgan ikkinchi o‘rtoqlik o‘yinida 6:4 hisobida g‘alabaga erishdi. Avvalgi uchrashuvda o‘zbekistonliklar 1:3 hisobida mag‘lub bo‘lgandi.

Eslatib o‘tamiz, Qozog‘iston terma jamoasi futzal bo‘yicha 2021-yilgi Jahon chempionatida yarim finalga qadar yetib borgandi.

Jahon

Ispaniyaning grand klublari CVC fondi bilan kelishuv sabab La Ligani sudga berdi. 10-dekabr kuni La Liga CVC bilan hamkorlik shartnomasi imzolanishini ma’lum qilgandi.

“Real” va “Barselona” avvaldan ushbu loyihaga qarshi chiqqandi. Ular mazkur bitim kelajakda klublarning media huquqlaridan tushadigan daromadiga jiddiy ta’sir o‘tkazishidan xavotirda. Shuningdek, “Real” yozdagi raddiyasida ushbu loyiha uch yilga tuzilgani bilan 50 yilga mo‘ljallangani va bu mantiqqa to‘g‘ri kelmasligi haqida iddao qilgandi.

Eslatib o‘tamiz, avvalroq A Seriya va Bundesliga ushbu kompaniyaning taklifiga rad javob bergandi.

Afrika Millatlar Kubogi—2022 koronavirus sabab bekor qilinishi mumkin

Afrika futbol konfederatsiyasi (CAF) 2022-yilning 9-yanvaridan 6-fevraliga qadar Kamerunda bo‘lib o‘tishi rejalashtirilgan Afrika Millatlar Kubogi musobaqasini bekor qilishi mumkin, deya xabar qilmoqda RMC Sport.

Bunga Kamerunda musobaqani o‘tkazish bilan bog‘liq masalalarda qiyinchilik tug‘ilayotgani va koronavirusning omikron shtammi tarqalishi sabab qilib ko‘rsatilgan.

CAF’ning bayonotiga ko‘ra, Kamerun kamchiliklarni bartaraf etish va musobaqani qabul qilish uchun kun-u tun harakat qilmoqda.

Mazkur musobaqa Yevropa, ayniqsa Angliya klublarining keskin noroziligiga sabab bo‘lmoqda. Sababi klublarning afrikalik futbolchilari bir oydan oshiq muddatga yo‘q bo‘lishi bilan birga qaytgandan keyin ma’lum muddat karantinda o‘tirishga majbur.

“Real”ning ikki futbolchisida koronavirus aniqlandi

Himoyachi Marselo va yarim himoyachi Luka Modrichning koronavirusga topshirgan testi ijobiy xulosa berdi. Bu haqda madridliklar klub matbuot xizmati ma’lum qildi.

Futbolchilar izolyatsiyaga olingan va madridliklarning yaqin oradagi o‘yinlarini o‘tkazib yuboradi. “Real”ning keyingi o‘yini 19-dekabr kuni “Kadis”ga qarshi bo‘lib o‘tadi.

Serxio Aguero futbolchilik faoliyatini yakunladi, Eriksen esa “Inter”dan ketmoqda

“Barselona” hujumchisi Serxio Aguero yuragidagi muammolar tufayli futbolchilik faoliyatini yakunlaganini ma’lum qildi.

Shuningdek, Yevro—2020 musobaqasida yurak xurujini boshdan kechirgan Kristian Eriksen “Inter” bilan xayrlashish arafasida. 29 yoshli yarim himoyachi va Milan klubi tez orada shartnomani bekor qiladi, deb xabar beradi jurnalist Nikolo Skira.

Eslatib o‘tamiz, Yevro—2020 yurak xurujidan so‘ng daniyalik futbolchiga kardioverter-defibrillyator joylashtirilgandi. Shundan so‘ng uning A Seriyada o‘ynay olmasligi ma’lum qilingandi.

Eriksen endilikda Daniyaga qaytishi mumkin, u hozirda sobiq jamoasi “Odense”da mashg‘ulot o‘tkazmoqda. Bundan tashqari, “Ayaks” ham u haqidagi ma’lumotlar bilan qiziqqandi.