Дунё ва ўзбек спортига оид 15 декабрнинг энг муҳим хабарлари дайжести билан танишинг.
Ўзбекистон
Ўзбекистон олимпия терма жамоаси Анталияда йиғин ўтказади
Темур Кападзе қўл остидаги Ўзбекистон олимпия терма жамоаси 15—28 декабрь кунлари Тошкент ва Анталия (Туркия) шаҳарларида йиғин ўтказади. Кападзе йиғинга жалб этилган футболчиларнинг якуний рўйхатини эълон қилди.
Таркибдан 27 нафар ўйинчи ўрин олди, уларнинг 17 нафари «Олимпик» клуби вакиллари бўлди.
Ўзбекистон футзал терма жамоаси Қозоғистонга қарши иккинчи ўйинда ғалаба қозонди
Футзал бўйича Ўзбекистон миллий терма жамоаси Қозоғистонга қарши кечган иккинчи ўртоқлик ўйинида 6:4 ҳисобида ғалабага эришди. Аввалги учрашувда ўзбекистонликлар 1:3 ҳисобида мағлуб бўлганди.
Эслатиб ўтамиз, Қозоғистон терма жамоаси футзал бўйича 2021 йилги Жаҳон чемпионатида ярим финалга қадар етиб борганди.
Жаҳон
«Реал», «Барселона» ва «Атлетик Б» Ла Лигани судга бердиИспаниянинг гранд клублари CVC фонди билан келишув сабаб Ла Лигани судга берди. 10 декабрь куни Ла Лига CVC билан ҳамкорлик шартномаси имзоланишини маълум қилганди.
«Реал» ва «Барселона» аввалдан ушбу лойиҳага қарши чиққанди. Улар мазкур битим келажакда клубларнинг медиа ҳуқуқларидан тушадиган даромадига жиддий таъсир ўтказишидан хавотирда. Шунингдек, «Реал» ёздаги раддиясида ушбу лойиҳа уч йилга тузилгани билан 50 йилга мўлжаллангани ва бу мантиққа тўғри келмаслиги ҳақида иддао қилганди.
Эслатиб ўтамиз, аввалроқ А Серия ва Бундеслига ушбу компаниянинг таклифига рад жавоб берганди.
Африка Миллатлар Кубоги—2022 коронавирус сабаб бекор қилиниши мумкин
Африка футбол конфедерацияси (CAF) 2022 йилнинг 9 январидан 6 февралига қадар Камерунда бўлиб ўтиши режалаштирилган Африка Миллатлар Кубоги мусобақасини бекор қилиши мумкин, дея хабар қилмоқда RМC Sport.
Бунга Камерунда мусобақани ўтказиш билан боғлиқ масалаларда қийинчилик туғилаётгани ва коронавируснинг омикрон штамми тарқалиши сабаб қилиб кўрсатилган.
CAF’нинг баёнотига кўра, Камерун камчиликларни бартараф этиш ва мусобақани қабул қилиш учун кун-у тун ҳаракат қилмоқда.
Мазкур мусобақа Европа, айниқса Англия клубларининг кескин норозилигига сабаб бўлмоқда. Сабаби клубларнинг африкалик футболчилари бир ойдан ошиқ муддатга йўқ бўлиши билан бирга қайтгандан кейин маълум муддат карантинда ўтиришга мажбур.
«Реал»нинг икки футболчисида коронавирус аниқланди
Ҳимоячи Марсело ва ярим ҳимоячи Лука Модричнинг коронавирусга топширган тести ижобий хулоса берди. Бу ҳақда мадридликлар клуб матбуот хизмати маълум қилди.
Футболчилар изоляцияга олинган ва мадридликларнинг яқин орадаги ўйинларини ўтказиб юборади. «Реал»нинг кейинги ўйини 19 декабрь куни «Кадис»га қарши бўлиб ўтади.
Серхио Агуэро футболчилик фаолиятини якунлади, Эриксен эса «Интер»дан кетмоқда
«Барселона» ҳужумчиси Серхио Агуэро юрагидаги муаммолар туфайли футболчилик фаолиятини якунлаганини маълум қилди.
Шунингдек, Евро—2020 мусобақасида юрак хуружини бошдан кечирган Кристиан Эриксен «Интер» билан хайрлашиш арафасида. 29 ёшли ярим ҳимоячи ва Милан клуби тез орада шартномани бекор қилади, деб хабар беради журналист Николо Скира.
Эслатиб ўтамиз, Евро—2020 юрак хуружидан сўнг даниялик футболчига кардиовертер-дефибриллятор жойлаштирилганди. Шундан сўнг унинг А Серияда ўйнай олмаслиги маълум қилинганди.
Эриксен эндиликда Данияга қайтиши мумкин, у ҳозирда собиқ жамоаси «Оденсе»да машғулот ўтказмоқда. Бундан ташқари, «Аякс» ҳам у ҳақидаги маълумотлар билан қизиққанди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)