Turkmaniston prezidenti Gurbanguli Berdimuhamedov 12-dekabr kuni Xalqaro betaraflik kuni sharafiga Betaraflik monumenti poyiga gul qo‘yish marosimidan so‘ng Ashxobod qabul markazida hukumat va parlament a’zolari hamda xorijiy diplomatlar ishtirokida ziyofat uyushtirdi. Bu haqda Turkmaniston davlat axborot agentligiga tayanib, “Xronika Turkmenistana” xabar berdi.
Turkmaniston rahbari turli maqollar bilan boyitilgan tabrik nutqida mehmonlarga turkman betarafligining ming yillik ildizlari, shuningdek, Axalteke otlari, gilamlari, alabay itlari haqida so‘zlab berdi.
Turkmaniston butun dunyoda tinchlikka intilayotganini, urush hech qachon yaxshilikka olib kelmasligini ta’kidlagan Berdimuhamedov shu munosabat bilan “Yashasin tinch hayot!” she’rini yozganini ma’lum qildi.
She’r matni “Neytralniy Turkmenistan” gazetasida chop etilgan.
Shundan so‘ng konsert boshlandi, uning davomida “Qoraqum” qo‘shig‘i va so‘zlari Berdimuhamedov tomonidan yozilgan qo‘shiqlar yangradi. Davlat rahbarining o‘zi avvalari qo‘shiqlarini omma oldida ijro etgan bo‘lsa, bu gal chiqish qilmagan yoki uning ijrosi telekameralar obyektiviga tushmagan, deb yozadi “Xronika Turkmenistana”.
Turkmaniston davlat axborot agentligining xabariga ko‘ra, konsertning yakuniy qismi Arkadag‘ — Berdimuhamedovning tinim bilmas faoliyatiga bag‘ishlangan qo‘shiqqa aylanib ketgan.
Avvalroq mahalliy matbuotda turkman shoirasi Go‘zel Shagulyevaning an’anaviy tarzda Berdimuhamedovga, uning she’riy va musiqiy iste’dodiga bag‘ishlangan yangi asari chop etilgandi.
“Esingizda bo‘lsa, Yangi yil arafasida Qahramon-Arkadag‘ muxlislariga o‘z kompozitsiyasidan iborat musiqiy albomini sovg‘a qilgandi. Ko‘plab muxlislar qatori men ham buni eshitishni o‘zim uchun katta zavq deb bilaman. Menga bu juda zarur! Men qo‘shiqni, musiqani juda intiqlik bilan kutgandim”, — deb yozadi shoira.
Izoh (0)