AOKAda bo‘lib o‘tgan brifingda Bandlik va mehnat munosabatlari vazirligi axborot xizmati rahbari Mavjuda Mirzayeva vazirlikning moliyaviy nazorat bo‘limi tomonidan 2021-yil o‘tgan davridagi faoliyati tahlili yuzasidan ma’lumot berdi.
Uning so‘zlariga ko‘ra, 2021-yilning o‘tgan 10 oyi davomida o‘tkazilgan o‘rganishlar natijasida jami 983 ta qonun buzilishi holatlari aniqlangan. Jumladan:
- Qoraqalpog‘iston Respublikasida — 31 ta,
- Samarqand viloyatida — 357 ta,
- Qashqadaryo viloyatida — 146 ta,
- Sirdaryo viloyatida— 124 ta,
- Jizzax viloyatida — 82 ta,
- Farg‘ona viloyatida — 62 ta,
- Navoiy viloyatida — 55 ta,
- Andijon viloyatida — 54 ta,
- Xorazm viloyatida — 25 ta,
- Namangan viloyatida — 19 ta,
- Buxoro viloyatida — 16 ta,
- Surxondaryo viloyatida — 8 ta,
- Toshkent shahrida — 4 ta.
Moliyaviy nazorat bo‘limi tomonidan o‘tkazilayotgan o‘rganishlar davomida aniqlangan noto‘g‘ri va ortiqcha to‘langan mablag‘larning 406 million 686 ming so‘mi vazirlik jamg‘armalariga aybdor shaxslardan qaytarilgan.
Aniqlangan xato va kamchiliklarni bartaraf etish, kelgusida takrorlanmasligining oldini olish maqsadida vazirlik yig‘ilishlarida keng muhokama qilinib, qat’iy chora-tadbirlar belgilanmoqda. Shuningdek, tizimda faoliyat yuritayotgan qo‘pol xato va kamchiliklarga yo‘l qo‘ygan xodimlarga nisbatan keskin choralar ko‘rib borilyapti.
Ta’kidlanishicha, qo‘pol kamchiliklarga yo‘l qo‘ygan va mablag‘larni noqonuniy sarflanganligi bo‘yicha ma’lumotlar qonuniy baho berish maqsadida Bosh prokuraturaga taqdim etilmoqda.
Shuningdek, brifingda ma’lum qilinishicha, hozirda ishsiz va band bo‘lmagan murojaat qiluvchi fuqarolarning barmoq izlari hamda yuzni tanish tizimini joriy etish orqali ajratilayotgan mablag‘lar haqiqatan ishsiz va band bo‘lmagan fuqarolarga yetib borayotganligi test rejimida ishga tushirilgan.
Avvalroq xalq ta’limi tizimida so‘nggi 11 oyda 27,5 mlrd so‘mlik o‘g‘irlik va kamomad aniqlangani, O‘zbekistonda 2021-yilning 9 oyida vazirliklar budjetdan qariyb 84 mlrd so‘m o‘zlashtirilgani to‘g‘risida xabar berilgandi.
Izoh (0)