АОКАда бўлиб ўтган брифингда Бандлик ва меҳнат муносабатлари вазирлиги ахборот хизмати раҳбари Мавжуда Мирзаева вазирликнинг молиявий назорат бўлими томонидан 2021 йил ўтган давридаги фаолияти таҳлили юзасидан маълумот берди.
Унинг сўзларига кўра, 2021 йилнинг ўтган 10 ойи давомида ўтказилган ўрганишлар натижасида жами 983 та қонун бузилиши ҳолатлари аниқланган. Жумладан:
- Қорақалпоғистон Республикасида — 31 та,
- Самарқанд вилоятида — 357 та,
- Қашқадарё вилоятида — 146 та,
- Сирдарё вилоятида— 124 та,
- Жиззах вилоятида — 82 та,
- Фарғона вилоятида — 62 та,
- Навоий вилоятида — 55 та,
- Андижон вилоятида — 54 та,
- Хоразм вилоятида — 25 та,
- Наманган вилоятида — 19 та,
- Бухоро вилоятида — 16 та,
- Сурхондарё вилоятида — 8 та,
- Тошкент шаҳрида — 4 та.
Молиявий назорат бўлими томонидан ўтказилаётган ўрганишлар давомида аниқланган нотўғри ва ортиқча тўланган маблағларнинг 406 миллион 686 минг сўми вазирлик жамғармаларига айбдор шахслардан қайтарилган.
Аниқланган хато ва камчиликларни бартараф этиш, келгусида такрорланмаслигининг олдини олиш мақсадида вазирлик йиғилишларида кенг муҳокама қилиниб, қатъий чора-тадбирлар белгиланмоқда. Шунингдек, тизимда фаолият юритаётган қўпол хато ва камчиликларга йўл қўйган ходимларга нисбатан кескин чоралар кўриб бориляпти.
Таъкидланишича, қўпол камчиликларга йўл қўйган ва маблағларни ноқонуний сарфланганлиги бўйича маълумотлар қонуний баҳо бериш мақсадида Бош прокуратурага тақдим этилмоқда.
Шунингдек, брифингда маълум қилинишича, ҳозирда ишсиз ва банд бўлмаган мурожаат қилувчи фуқароларнинг бармоқ излари ҳамда юзни таниш тизимини жорий этиш орқали ажратилаётган маблағлар ҳақиқатан ишсиз ва банд бўлмаган фуқароларга етиб бораётганлиги тест режимида ишга туширилган.
Аввалроқ халқ таълими тизимида сўнгги 11 ойда 27,5 млрд сўмлик ўғирлик ва камомад аниқлангани, Ўзбекистонда 2021 йилнинг 9 ойида вазирликлар бюджетдан қарийб 84 млрд сўм ўзлаштирилгани тўғрисида хабар берилганди.
Изоҳ (0)