Prezidentimiz raisligida qurilish materiallari sanoatini rivojlantirish va aholini uy-joy bilan ta’minlash masalalari bo‘yicha o‘tkazilgan videoselektor yig‘ilishida berilgan topshiriqlar ijrosi yuzasidan o‘tkazilgan matbuot anjumani.
Qurilish vazirligidan mas’ullar ishtirokida AOKAda joriy yilning 9-dekabrida matbuot anjumani o‘tkazildi. Unda ma’lum qilinishicha, ipoteka dasturi asosida, joriy yilda 207 ta massivda 1 ming 75 ta ko‘p qavatli uylar qurilishi olib borilmoqda. Jami xonadonlar soni — 45,5 mingta.
Jumladan:
- “Qishloq qurilish invest” kompaniyasi ishtirokida qishloq joylarda 11,3 mingta kvartirali;
- “Shahar qurilish invest” kompaniyasi ishtirokida fuqarolarning alohida toifalari uchun 3,5 mingta kvartirali;
- yangi tartib doirasida tadbirkorlik subyektlari tomonidan 30,6 mingta kvartirali uylar qurilmoqda.
- yangi tartib asosida 4 ta hududda — Andijon, Buxoro, Samarqand, Surxondaryoda 2 ming kvartirali 49 ta uylar;
- Osiyo taraqqiyot banki mablag‘lari hisobiga “Qishloq qurilish invest” ishtirokida 2 ming 900 kvartirali 138 ta uylar ham qurilmoqda.
Uylarning qurilish-montaj ishlari sifati yuzasidan qurilish sohasida nazorat inspeksiyalari tomonidan nazorat o‘rnatilgan. Hududiy inspeksiyalar tomonidan mazkur obyektlarda jami 4074 marta nazorat ishlari amalga oshirilgan. Qurilishda aniqlangan kamchiliklarni bartaraf etish bo‘yicha jami 2 880 ta yozma ko‘rsatmalar berildi.
Shuningdek, 47 ta mansabdor shaxsga nisbatan chora ko‘rish uchun hujjatlar tayyorlanib, sudlarga yuborildi. Qurilish-montaj ishlari sifatsiz bajarilgan 12 ta obyektda ishlar vaqtincha to‘xtatildi.
Obyektlarda sifatsiz material va buyumlardan foydalanilganlik uchun tegishli tashkilotlarga 26 ta taqdimnoma kiritildi.
Uylar qurilishida reytingi 3 ta “S”dan yuqori pudrat tashkilotlari ishtirok etadi. Bugungi kunda bu kabi salohiyatli pudrat tashkilotlari soni 4876 tadan ortiqni tashkil etmoqda.
Uylar qurilishida mahalliy qurilish materiallaridan foydalanish, issiqlik tejovchi qoplamalar va zamonaviy texnologiyalarni qo‘llash ta’minlanadi. Buning uchun qurilish materiallari ishlab chiqaruvchi mahalliy korxonalar bilan ham ishlanmoqda. Kelgusida ushbu ishlarni industriya darajasiga ko‘tarib, uy-joy qurilishi klasterlarini tashkil etish bo‘yicha ham ishlanmoqda.
Dastlabki bosqichda Toshkent shahri, Farg‘ona, Navoiy, Samarqand va Toshkent viloyatlarida klasterlarni tashkil qilish maqsadga muvofiq. Chunki mazkur hududlarda yetarlicha miqdorda pudrat tashkilotlari, loyiha institutlari, ishlab chiqarish korxonalari, xomashyo bazasi va infratuzilma mavjud.
Hozirgi kunda 2022-yilda uy-joylar qurish dasturi loyihasi ishlab chiqildi. Bunda Farg‘ona viloyati, Bog‘dod tumanida barpo etilgan “Muruvvat” massivi namunasi asosida barcha hududlarda “Yangi O‘zbekiston” massivlarini qurish ko‘zda tutilmoqda.
Hokimliklar bilan birgalikda 30 ga yaqin massiv tanlab olindi. Ularda ko‘p qavatli uylar, ijtimoiy soha, bozor infratuzilmasi va muhandislik obyektlarini joylashtirish bo‘yicha bosh reja loyihalari ishlab chiqildi.
Unga ko‘ra, kelgusi yilda 2191 ta uylar, 27 ta maktab, 40 ta bog‘cha, 25 ta oilaviy poliklinika va 120 dan ortiq savdo-maishiy xizmat majmuasi qurish ko‘zda tutilmoqda.
Matbuot anjumaniga tashrif buyurgan OAV vakillari ham o‘zlarini qiziqtirgan barcha savollarga tegishli javoblar olishdi.
Rasmiy sahifalarimiz:
Reklama huquqi asosida.
Izoh (0)