Toshkent shahar IIBB boshlig‘i 2021-yilning 11 oylik ish natijalari bo‘yicha tanqidiy yig‘ilish o‘tkazdi. Yig‘ilishda poytaxt ichki ishlar organlari tomonidan amalga oshirilgan ishlar sarhisob qilindi, deb xabar bermoqda poytaxt IIBB matbuot xizmati.
Qayd etilishicha, bevosita xodimlarning tashabbusi bilan 5 644 ta jinoyatlar, ulardan 1 375 tasi giyohvandlik va psixotrop vositalarining noqonuniy savdosi bilan bog‘liq jinoyatlar aniqlangan bo‘lib, unda 122 kilogramm 756 gramm giyohvandlik va 108 ming 550 dona kuchli ta’sir qiluvchi dori vositalarining tarqalib ketishining oldi olingan. 12 544 ta jinoyat fosh etilgan, ulardan 171 tasi o‘tgan yillarda sodir etilgan jinoyatlar bo‘lgan. Shuningdek, 822 nafar qidiruvdagi jinoyatchilar ushlanib, jazo muqarrarligi ta’minlangan.
Shuningdek, yig‘ilish davomida jinoyatchilikka qarshi kurashish va huquqbuzarliklarni barvaqt oldini olishda qator kamchiliklarga yo‘l qo‘ygani uchun bir qator mansabdorlarga chora ko‘rilgan.
Xususan, Chilonzor tumani IIO FMB boshlig‘ining birinchi o‘rinbosari, huquqbuzarliklar profilaktikasi bo‘yicha o‘rinbosari, shuningdek, Yangihayot va Shayxontohur tumanlari IIO FMB boshliqlarining huquqbuzarliklar profilaktikasi bo‘yicha o‘rinbosarlari egallab turgan lavozimidan ozod etilgan. Sergeli tumani IIO FMB boshlig‘i, uning birinchi o‘rinbosari, huquqbuzarliklar profilaktikasi bo‘yicha hamda jamoat tartibini saqlash bo‘yicha o‘rinbosarlari intizomiy jazoga tortilgan.
“Shu bilan bir qatorda, tumanda ijobiy ko‘rsatgichlarga erishgan va namunaviy xizmat olib borayotgan Mirzo Ulug‘bek va Yashnobod tumanlari IIO FMB boshliqlariga tashakkur ham e’lon qilindi”, — deya ta’kidlanadi xabarda.
Izoh (0)