Ichki ishlar vaziri matbuot kotibi Shohrux G‘iyosov 2020-yil aprel oyidagi karantin vaqtida Qashqadaryoning Muborak tumanida o‘tkazilgan to‘y haqidagi axborotni rad etib, jamoatchilikni chalg‘itishga uringan viloyat IIB axborot xizmatining xatti-harakatini qoraladi. Bu haqda Qarshi shahrida Shohrux G‘iyosov ishtirokidagi matbuot anjumanida so‘z bordi, deya xabar berdi “Daryo” muxbiri.
Muloqot davomida 2020-yilning aprelida viloyatning Muborak tumanida shifokorlar oilasi karantinga amal qilmay to‘y qilgani haqida xabarni rad etgan viloyat IIB axborot xizmatining sobiq rahbariga qanday chora ko‘rilgani so‘raldi.
“Mazkur xabar jamoatchilikka oshkor bo‘lgach, viloyat IIB axborot xizmatining sobiq rahbari Iroda Rasulova hamda ‘Sevimli’ kanali mazkur xabarni rad etib, to‘y bo‘lgani haqida xabar tarqatgan Muborak tumani hokimligining sobiq axborot xizmati rahbari Zafar Jo‘rayevning tuman IIBda so‘roq berayotganini bildirgandi. ‘Daryo’ muxbiri mazkur holatni oxirigacha o‘rganib, haqiqatan ham karantinda to‘y qilinganini, shu bois ham to‘y qilgan shifokorlar oilasi jarimaga tortilganini oshkor qildi.
Demak, o‘sha paytda telekanal muxbiri bilan hamkorlik qilgan viloyat IIB axborot xizmati jamoatchilikni chalg‘itib, yolg‘on axborot tarqatgan bo‘lib chiqdi. Xo‘sh, buning uchun IIB matbuot kotibiga chora ko‘rildimi?”, — deya savol berdi jurnalist-bloger O‘raljon Kamolov.
Shohrux G‘iyosov karantinda to‘y o‘tkazilgani haqidagi axborotga rad javob berish va bu haqda xabar tarqatgan matbuot kotibining IIBda so‘roq qilinayotganini jamoatchilikka ko‘rsatish viloyat IIB axborot xizmatining o‘sha paytdagi rahbari Iroda Rasulovaga tegishli tashabbus ekanini bildirdi. Uning xatti-harakati tarixda tizimning aybi sifatida qolganini ham tan oldi. Biroq unga chora ko‘rilgan yoki ko‘rilmaganini ochiq qoldirdi.
“Bu axborot xizmati rahbarining shaxsiy tashabbusi bo‘lgan. Bu haqda menga ham o‘sha paytda aytishib, ‘shu haqda o‘rganamiz’ degandi. Axborot xizmati rahbarining bunday tashabbus bilan chiqishi yaxshi, albatta. Lekin bu bizning o‘sha paytdagi xatomiz bo‘lib qoldi. Aslida biz ishga umumiy baho berilganidan keyin axborot berishimiz kerak bo‘ladi. O‘sha paytda esa viloyat IIB axborot xizmati voqeaga to‘liq huquqiy baho berilmasdan avval bu haqda televideniyeda axborot bergan va xato qilgan”, — dedi Shohrux G‘iyosov.
Eslatib o‘tamiz, “Daryo”da 2020-yil 15-aprel kuni viloyatning Muborak tumanida karantinga amal qilmagan shifokorlar 2020-yil 14-aprel kuni to‘y qilgani haqida xabar berilgandi. Mazkur xabar ortidan viloyat IIB axborot xizmati bilan hamkorlikda lavha tayyorlagan “Sevimli” kanalining “Zamon” informatsion dasturi muxbiri to‘y bo‘lgani haqidagi xabarni rad etishga uringandi “Daryo” muxbiri surishtiruvlariga ko‘ra, to‘y qilgan shifokorlarning aybi aniqlanib, jarimaga tortilgani oshkor bo‘ldi.
Izoh (0)