Bugun,

  • USD 11014.01
  • RUB 191.8
  • EUR 10674.78

Surxondaryo viloyatining Denov shahridagi savdo markazida ro‘y bergan portlash voqealarini o‘rgangan “Daryo” muxbirining voqea jabrlanuvchilari bilan ko‘rishishiga to‘sqinlik qilgan IIB xodimi xatti-harakati uchun javobgarlikka tortiladi. Bu haqda ichki ishlar vazirining matbuot kotibi Shohrux G‘iyosov Qarshi shahrida jurnalist va blogerlar bilan bo‘lib o‘tgan matbuot anjumanida ma’lum qildi, deya xabar berdi “Daryo” muxbiri.

Foto: “Daryo”

Foto: “Daryo”

Qayd etilishicha, viloyat IIB boshlig‘i muxbir faoliyatiga qarshilik ko‘rsatgan xodimiga portlash asoratlari bartaraf etilganidan so‘ng chora ko‘rilishini bildirgan.

“Bu haqda rahbari bilan gaplashdim. Haqiqatan ham bizning xodim u yerda xatoga yo‘l qo‘ygan. Aslida bemor oldiga kirib-chiqishga ruxsat berish yoki bermaslik shifokor vakolatiga kiradi. Ammo o‘sha payt bizning xodim tashabbus ko‘rsatib, kirish mumkin emas degan. Xodim bu harakati bilan haqiqatan ham noto‘g‘ri qilgan. Shuning uchun bu haqda rahbari bilan gaplashdik. Rahbar qaytganidan so‘ng, xodimi bilan gaplashib, unga chora ko‘rilishini aytdi”, — dedi Shohrux G‘iyosov.

Uning taxmin qilishicha, muxbir faoliyatiga qarshilik ko‘rsatib, uning axborot olishiga to‘sqinlik qilgan xodimga tanbeh chorasi qo‘llaniladi.

“Bu xodimimizga tanbeh beriladi. Ya’ni noto‘g‘ri harakat qilgani uchun”, — dedi Shohrux G‘iyosov.

Eslatib o‘tamiz, Denovdagi portlash voqealarini o‘rgangan “Daryo” muxbiri portlashdan jabrlangan bemorlarning 4 nafari bilan ko‘rishib, ularning voqea haqidagi fikrlarini o‘rgangach, tuman tibbiyot birlashmaning boshqa bo‘limida davolanayotgan uch nafar bemor bilan ham suhbatlashishni maqsad qilgan. Biroq o‘zini Sherzod deya tanishtirgan IIB xodimi muxbir faoliyatiga to‘sqinlik qilib, uning bemorlar bilan ko‘rishishini taqiqlagan.

IIB xodimlari tomonidan “Daryo” muxbirining ish faoliyatiga to‘sqinlik qilish avvalroq Qarshi shahrida ham ro‘y bergandi. O‘shanda jurnalist faoliyatiga qarshilik qilgan Qarshi shahar IIO FMB boshlig‘i o‘rinbosari Azamat Shaymardanov muxbirning xizmat guvohnomasi bilan tanishgan bo‘lishiga qaramasdan uning ish qurolini tortib olib, asabiga o‘ynamaslikni maslahat bergandi.

Viloyat IIB mas’ullari esa jurnalist faoliyat qarshilik qilgan o‘zboshimcha xodimga shunchaki “qattiq hayfsan” berish bilan cheklangandi.

Eslatib o‘tamiz, Surxondaryoning Denov shahri markazidagi “Indenim” savdo majmuasida kuchli portlash 7-dekabr tongida yuz bergan. Rasmiy ma’lumotlarga ko‘ra, portlash oqibatida kamida ikki kishi halok bo‘lgan, 11 kishi turli tan jarohatlari bilan shifoxonaga yotqizilgan. Keyinchalik Denovdagi portlashda 65 ta uy zarar ko‘rgani, 6 ta xonadon devorlari esa yorilib, yashash uchun xavfli holatga kelib qolgani ma’lum bo‘ldi.

Surxondaryo viloyati hokimi To‘ra Bobolov ikki nafar marhumning yaqinlariga moddiy yordam puli to‘lab berilayotganini ma’lum qildi. U, shuningdek, tadbirkorlarga yetkazilgan zarar, 65 ta xonadon ta’miri va ijtimoiy soha obyektlarining zararlanishi oqibatida kelib chiqqan chiqimlar ham sud qaroriga ko‘ra ikki xil usulda qoplanishini bildirgan.

Dastlabki taxminlarga ko‘ra, portlash gaz asbob-uskunalaridan foydalanish qoidalarining buzilishi oqibatida to‘plangan gaz-havo aralashmasining chaqnashi oqibatida yuz bergan. Holat yuzasidan Jinoyat kodeksining 257-modda (mehnatni muhofaza qilish qoidalarini buzish) va 259-moddalari (yong‘in xavfsizligi qoidalarini buzish) bilan jinoyat ishi qo‘zg‘atilgan.

Izoh
Asosiy yangiliklar
Mahalliy
Shavkat Mirziyoyev Sankt-Peterburgda MDHga a’zo davlatlar rahbarlari norasmiy uchrashuvida ishtirok etdi (foto)
Kino
Vaqtingizga achinmaysiz: So‘nggi o‘n yillikning eng yaxshi multfilmlari (video)
Dunyo
Putin va harbiylar o‘rtasidagi yopiq uchrashuvdan so‘ng, Rossiya davlat matbuotiga urushdagi muvaffaqiyatsizliklar haqida yozishga ruxsat berildi