Bugun,

  • USD 11095.31
  • RUB 173.84
  • EUR 10772.44

“Daryo” internet-nashri muxbiri Otabek Qo‘ldoshevga nisbatan qo‘pollik qilgan Qarshi shahar Ichki ishlar organlari (IIO) faoliyatini muvofiqlashtirish boshqarmasi (FMB) boshlig‘i o‘rinbosari Azamat Shaymardanovga nisbatan “qattiq hayfsan” intizomiy jazosi qo‘llanildi. Bu haqda Qashqadaryo viloyati IIB matbuot xizmati 26-aprel kuni ma’lum qildi.

Azamat Shaymardanov.

Azamat Shaymardanov.
Kadr: Telegram

Otabek Qo‘ldoshev 2021-yilning 16-aprel kuni Qarshi shahridagi Ko‘k gumbaz jome masjididan Ramazon oyining birinchi juma namozidan fotoreportaj tayyorlayotgan vaqtida Qarshi shahar IIO FMB boshlig‘i o‘rinbosari Azamat Shaymardanovning qarshiligiga uchragan edi.

Shaymardanov jurnalistning ish qurolini zo‘rlik bilan tortib olib, qo‘l ostidagi xodimlarga Otabek Qo‘ldoshevni “olib borib, tiqib qo‘yish”ni buyurgan. Jurnalist IIO FMBning maxsus avtomobilida yarim soat olib yurilib, oxiri Qarshi shahar IIO FMB 1-sonli ichki ishlar bo‘limi (IIB)ga yetkazilgan.

“Daryo” tahririyati voqeadan xabar topishi bilan Ichki ishlar vazirligi (IIV) matbuot kotibi Shohrux G‘iyosov bilan bog‘langan, shuningdek, qashqadaryolik bir guruh jurnalist va blogerlar Qarshi shahar IIO FMB 1-sonli IIB oldida to‘plangan. Ko‘p o‘tmay IIBga Qarshi shahar IIO FMB boshlig‘i B.Mirzayev va viloyat IIB axborot xizmati rahbari Iroda Rasulova ham yetib kelgan. Mas’ullar jurnalist nima sababdan bo‘limga olib kelingani yuzasidan tayinli axborot bermay, qo‘pollik qilgan xodimga chora ko‘rilishini bildirgan.

Otabek Qo‘ldoshev.

Otabek Qo‘ldoshev.
Foto: Telegram

Yuzaga kelgan vaziyat yuzasidan IIV matbuot xizmati ham bayonot berib, “muxbir Otabek Qo‘ldoshev bilan suhbat jarayonida kasb etikasini buzgan ichki ishlar organi xodimining harakatlari o‘rganib chiqilib, huquqiy baho berilishi”ni ma’lum qilgandi. Hodisa ijtimoiy tarmoqlarda aks-sado berib, vaziyatga, jumladan, Mass-media fondi rahbari Komil Allamjonov va AOKA ham munosabat bildirgan edi. Jumladan, agentlik “bu kabi holatlar davlat siyosatiga zid” ekanligini alohida ta’kidlagan. Qashqadaryo viloyati hokimi Zoir Mirzayev esa Otabek Qo‘ldoshev bilan suhbatda “ish uning nazoratida ekani, aybdorga qonuniy chora ko‘rilishi”ni bildirgan edi.

Qashqadaryolik jurnalist va blogerlar xavotirda

“Daryo” Qashqadaryo IIBning bayonoti e’lon qilinishi arafasida qashqadaryolik jurnalist va blogerlarning vaziyat yuzasidan fikrlarini o‘rgangan edi. E’tiborga molik tomoni, jamoatchilik faollari jurnalistga nisbatan qo‘pollik qilgan ichki ishlar organi xodimiga nisbatan qattiq jazo tayinlanishiga ishonmasligini viloyat IIB bayonotidan avval bildirgan edi.

“Qashqadaryo viloyat IIB axborot xizmati ayni kunga qadar tizimda xatoga yo‘l qo‘ygan xodimga keskin chora ko‘rgani haqida biror marta xabar bermagan. Demak, yo boshqarma axborot xizmati bunday ma’lumotni yashirgan, yoki tizimda o‘zboshimcha xodimlarga umuman chora ko‘rilmaydi”, — deya taxmin qiladi bloger Otabek Artikov.

Otabek Artikov.

Otabek Artikov.
Foto: “Daryo”

“To‘g‘risi, IIVdan ijobiy natija kutmayapman. Jurnalistga qilingan munosabatni ko‘rib, men IIB xodimlarini sovet davri militsionerlariga o‘xshatdim. O‘sha paytda IIB kuchishlatar tizim edi. Aftidan, Qashqadaryodagi IIB xodimlari ham o‘zini hamon kuchishlatar tizim vakillari deb biladi. Shu bois menda tizimga nisbatan shubha bor”, — dedi bloger.

“Bo‘lib o‘tgan voqea videosini ko‘rgach, menda eski zamon qaytdimikin, endi IIB xodimlarini telefon yoki kamerada tasvirga olish mumkin emasmikin, yana o‘shanday ‘olib borib tiq’, ‘qama’, ‘ko‘ziga ko‘rsatib qo‘y’, degan tamoyil bo‘yicha ish olib borilyaptimi, degan hadik paydo bo‘ldi”, — deydi boshqa bir bloger Maqsud Muzaffarov.

Maqsud Muzaffarov.

Maqsud Muzaffarov.
Foto: “Daryo”

Bloger Otabek Artikov esa mazkur jarayonda Qashqadaryo viloyati IIB axborot xizmati rahbari Iroda Rasulovaning “jurnalist yoki bloger ko‘chada xizmat guvohnomasini yoki beyjigini olib yurishi kerak” deya fikr bildirganini ham qoraladi (qayd etish joiz, Otabek Qo‘ldoshev masjiddan reportaj tayyorlayotgan vaqtida xizmat guvohnomasi yonida bo‘lmagan, u guvohnomasini IIB xodimlari so‘ragach mashinasidan olib kelgan).

“Iroda Rasulova o‘sha holatda ham jurnalistni aybdorga chiqarmoqchi bo‘ldi. Bu esa menda hadik paydo bo‘lishiga, ertaga men ham ‘Daryo’ muxbiri tushgan holatga tushib qolmasmikinman degan qo‘rquv paydo bo‘lishiga sabab bo‘ldi. Vaholanki, blogerlarda xizmat guvohnomasi ham, beyjik ham bo‘lmasligini yosh bola ham biladi. IIB axborot xizmati rahbari shunday deb turgach, xodimlaridan nimani kutamiz?!”, — deydi bloger Otabek Artikov.

“Prezident siyosatiga xiyonat”

Ushbu ko‘ngilsiz voqea prezident Shavkat Mirziyoyev ommaviy axborot vositalariga katta ishonch bildirayotgan va hurmat ko‘rsatayotgan, ularning xodimlarini “yelkadosh”, “yordamchi” deb atayotgan vaqtda yuz bergani yanada achinarli. Bloger Maqsud Muzaffarov bu borada keskin munosabat bildirgani ham tushunarli.

“Viloyat IIBdan tizimdagi xodimlarga jurnalist va blogerlar bilan muloqot qilishni, ishlashni o‘rgatishlarini talab qilib qolardim. Boisi prezidentimizning bugungi OAVga bo‘lgan hurmati cheksiz. Jurnalistga qilingan munosabat esa Prezidentning bugungi kundagi siyosatiga xiyonat deb hisoblayman”, — deydi u.

Norbo‘ta G‘oziyev.

Norbo‘ta G‘oziyev.
Foto: Telegram

“Huquq” gazetasining Qashqadaryo viloyatidagi muxbiri Norbo‘ta G‘oziyev ham shu fikrda: “Prezident jurnalistlarga ‘Sizlar menga yelkadoshsiz, yordamingizga tayanaman, adolatni yetkazishdan to‘xtamanglar, qo‘rqmanglar, ortingizda prezident turibdi’, deb turgan bir paytda, jurnalist va blogerlarga nisbatan nohaq, turli tazyiqlar o‘tkazgan IIB xodimlari jazolanganidan keyin ham bunday holatning takrorlanishi soha xodimlari uchun uyat”.

“Bunday xodim ishdan bo‘shatilishi kerak”

Bloger Farrux Fayziyevning so‘zlariga ko‘ra, fuqaroga qo‘pollik qilgan xodimning uzr so‘rash yoki hayfsan olish bilan qutilib ketishi IIV tizimidagi o‘zboshimcha xodimlar soni ko‘payishiga sabab bo‘lishi mumkin. Ayni vaqtda, boshqa bir guruh blogerlar, qo‘pol xodimga nisbatan keskin jazo tayinlanishiga ishonmasa-da, aslida u ishdan bo‘shatilishi kerakligini ta’kidlamoqda.

Farrux Fayziyev.

Farrux Fayziyev.
Foto: “Daryo”

“Vazirlik o‘z xodimga chora ko‘rishiga unchalik ishonmayman. Xizmat tekshiruvi o‘tkazilmoqda, chora ko‘ramiz deyishadi va shu bilan hammasi unutiladi. YPX inspektorlarining IIB xodimi nomiga dog‘ tushirishi holatlarini isbotlab beramiz, ammo ular doim uzr so‘rash va tanbeh olish bilan qutilib qoladi. Aslida prezidentning 3413-sonli qarori bor, unga ko‘ra, IIB xodimi nomiga dog‘ tushirgan xodimga ishdan bo‘shatishgacha bo‘lgan chora qo‘llanilishi kerak. Fikrimcha, jurnalistga qilingan munosabat uchun bu xodim ishdan bo‘shashi kerak”, — deya qo‘shimcha qildi Maqsud Muzaffarov.

Umid Karimov.

Umid Karimov.
Foto: “Daryo”

Kapitan Karimov taxallusi bilan faoliyat olib boruvchi bloger Umid Karimovning ta’kidlashicha, amaldagi tizimda mansabdor xodimning ishdan bo‘shatilishi ham uning uchun yetarlicha jazo emas, chunki aksariyat hollarda bunday xodimlar shov-shuvlar tinib, e’tibor susaygach, biror quyi lavozimda, masalan, tuman bo‘limida ish boshlaydi. “Taxminimcha, ishdan olinsa ham, qaysidir tumanga ishga qo‘yiladi”, — deydi bloger.

Qashqadaryo viloyat IIBning 26-apreldagi bayonotida ta’kidlanishicha, “‘Ichki ishlar organlari xodimlarining odob-axloq qoidalari’ning tegishli bandlari hamda IIO faoliyatini tartibga soluvchi me’yoriy buyruqlar talablarini qo‘pol ravishda buzib, fuqarolarda IIOlariga nisbatan salbiy fikrlar uyg‘onishiga sababchi bo‘lgani uchun Qarshi shahar IIO FMB boshlig‘ining o‘rinbosari Azamat Shaymardanovga nisbatan ‘qattiq hayfsan’ intizomiy jazosi qo‘llandi”. Xizmat tekshiruvi xulosasi nusxasi va to‘plangan hujjatlar huquqiy baho berish uchun Qarshi shahar prokuraturasiga yuborilgan — tayinlangan jazoning qanchalik haqqoniy va qonuniyligiga endi prokuratura organlari baho beradi.

Izoh
Asosiy yangiliklar
Mahalliy
“Daryo” kundaligida 2-dekabrda sodir bo‘lgan eng muhim voqealar
Mahalliy
“Ifloslantiruvchi to‘laydi” tamoyili, “yashil sertifikatlar”, energiya ulushini kamaytirish: Mirziyoyev “yashil” iqtisodiyot taqdimoti bilan tanishdi
Dunyo
Britaniya razvedkasi Rossiya Ukrainadagi urushda quruqlikdan hujum qilolmayotgani sababini tushuntirdi