Surxondaryoning Denov shahri markazidagi “Indenim” savdo majmuasida 7-dekabr tongida kuchli portlash yuz bergan edi. Rasmiy ma’lumotlarga ko‘ra, portlash oqibatida kamida ikki kishi halok bo‘lgan, to‘qqiz kishi turli tan jarohatlari bilan shifoxonaga yotqizilgan. “Daryo” muxbiri Denov tuman tibbiyot birlashmasida bo‘lib, davolanayotgan jabrlanuvchilar bilan suhbatlashdi.

Savdo majmuasida ish boshlaganiga 7-dekabr kuni ikki oy to‘lgan Abdulla Do‘lanovning aytishicha, portlash yuz bergan vaqtda binoda yetti kishi bo‘lgan. “Savdo markazining ikkinchi qavatidagi xonalarda uch kishi yotgandik. Soat taxminan 2 yo 3 larda portlagan. Uyg‘onsam, boshimdan qon ketyapti, oyog‘im beton bo‘lagi ostida qisilib qolgan, sherigim esa baqirib yordamga chaqiryapti”, — deb eslaydi u.

Abdulla Do‘lanov.

Foto: “Daryo” / Asliddin Eshonqulov

Rasman e’lon qilingan dastlabki taxminlarga ko‘ra, noxush hodisa gaz asbob-uskunalaridan foydalanish qoidalarining buzilishi oqibatida to‘plangan gaz-havo aralashmasining chaqnashi oqibatida yuz bergan. Ayni vaqtda, Abdulla Do‘lanovning so‘zlariga ko‘ra, “gaz umuman chiqmagan — hidi chiqsa, sezgan bo‘lishardi”. Uning ta’kidlashicha, majmuada ishchilar uchun oshxona bor edi, unda gaz-ballondan foydalanilmasdi.

Islom Ostonoqulov va uning rafiqasi Feruza Omonova 2021-yil aprelidan beri Termizdan Denovga kelib, ushbu savdo majmuasida ishlardi. Islom Ostonoqulov portlashdan keyingi dastlabki daqiqalardagi voqealar “tushida bo‘lyapti” deb o‘ylagan; u o‘zining ahvoli yaxshiligini aytadi, biroq turmush o‘rtog‘ining ahvoli og‘ir (ayolini qutqarish lahzalarini eslarkan, ko‘zidan beixtiyor yosh chiqib ketadi).

Islom Ostonoqulov.

Foto: “Daryo” / Asliddin Eshonqulov

“Oyog‘im ustida beton bo‘lagi bor ekan. Atrofdagi odamlarni ko‘rib, baqirib ularni yordamga chaqirdim — ovozim chiqmadimi yo ular eshitmadimi, darrov kela qolishmadi. Kelishgach, ularning yordami bilan amallab chiqib oldim. Keyin baqirib, yordamga chaqirayotgan xotinimning oldiga bordik. Uni beton bosgan, kallasi yirtilib yotibdi, sochlarini beton bo‘laklari qisib qolgan ekan, juda qiyin ahvolda edi”, — deydi u.

O‘rinboy Saidov.

Foto: “Daryo” / Asliddin Eshonqulov

Tan jarohati olganlarning hammasi ham savdo majmuasidagilar emas. O‘rinboy Saidov majmua yonidagi somsaxonada ishlaydi. Portlash yuz bergan vaqtda u majmua yonidan o‘tib, hovli tomon chiqib borayotgan bo‘lgan. “Birdan kuchli shamol turdi va meni yiqitdi. Yerda yotibman, turolmayman. Turaman desam, oyog‘im singan ekan — nimadir tegib, sindiribdi, o‘zim ham bilmaganman”, — deydi u.

Foto: “Daryo” / Asliddin Eshonqulov

Savdo majmuasidan taxminan 80—100 metr masofada joylashgan aloqa operatori shoxobchasining qo‘riqchisi Kamoliddin Rahimov portlash yuz bergan vaqtda uyg‘oq, telefonida o‘yin o‘ynab o‘tirardi. “Qisqa fursatda yuz bergan gumburlash ovozi va zarbini so‘z bilan tushuntirib berolmayman. Bir-ikki deguncha sodir bo‘ldi-da. Portlash zarbidan binoimizning oynalari sinib ketdi”, — deydi u.

Muallif:Otabek Qo‘ldoshev