O‘zbekiston yo‘llarida sodir bo‘lgan hodisalar haqida batafsil ma’lumotlar taqdim etamiz.
15 yoshli bola boshqaruvidagi Cobalt Matiz bilan to‘qnashib yonib ketdi.
2021-yil 8-dekabr kuni taxminan soat 22:00 da Shifo nur va Talabalar ko‘chalari kesishmasida Cobalt avtomobilini tegishli huquqsiz boshqargan 15 yoshli A.M. qarama-qarshi harakat yo‘liga chiqib, 33 yoshli R.I. boshqaruvidagi Matiz avtomobiliga to‘qnashgan.
To‘qnashuvdan so‘ng Cobalt harakatni boshqaruvsiz davom etib daraxtga urilgan va yonishni boshlagan. Yong‘in voqea joyiga yetib kelgan yong‘in xavfsizligi xodimlari tomonidan o‘chirildi.
To‘qnashuv oqibatida ikkala haydovchi ham badan shikastlari bilan tibbiyot muassasasiga yetkazildi. Ularning holati qoniqarli.
Ushbu fakt bo‘yicha Toshkent shahar IIBB xodimlari tomonidan tergov tekshiruv o‘tkazilmoqda.
Chustda Nexia 54 yoshli piyodani urib ketdi.
2021-yil 3-dekabr kuni soat 20:20 larda, “Shoyon” MFY hududida, Chust tumanida yashovchi, 1995-yilda tug‘ilgan fuqaro Nexia avtomashinasini boshqarib borayotib, harakat xavfsizligini ta’minlay olmay, yo‘lni kesib o‘tayotgan ayolni( Chust tumanida yashagan, 1967-yilda tug‘ilgan) urib yuborgan.
Oqibatda piyoda o‘ta og‘ir qo‘shma shikastlanish, bosh miya lat yeyishi, ko‘krak qafasi yopiq shikastlanishi tashxisi bilan tan jarohati olib, ko‘rsatilgan tibbiy muolajalarga qaramay shifoxonada vafot etgan.
Ushbu holat bo‘yicha Chust tuman IIB huzuridagi TB tomonidan 2021-yil 4-dekabr kuni Jinoyat kodeksining 266-moddasi 2-qismi (transport boshqarish xavfsizligi qoidalarini buzish) bilan jinoyat ishi qo‘zg‘atilgan.
Toshkent viloyatida 4 ta avtomobil va avtobus ishtirokida YTH sodir bo‘ldi.
Dastlabki ma’lumotlarga ko‘ra, 2021-yil 9-dekabr kuni soat 07:30 larda, Toshkent viloyati, Yuqori Chirchiq tumani hududidan o‘tgan Toshkent–Olmaliq avtomobil yo‘lining 36-kilometrida, tumanli ob-havo sharoitida, yo‘lning ko‘rinish masofasi kamligi sababli bir yo‘nalishda oldinma-ketin harakatlanib kelayotgan Damas, Nexia, Spark, Nexia-3 avtomobillari hamda Isuzu avtobusi ishtirokida to‘qnashuv sodir bo‘lgan.
To‘qnashuv natijasida tan jarohati olgan fuqarolar yo‘q.
Mazkur YTH yuzasidan Yuqori Chirchiq tumani IIB YHXB xodimlari tomonidan hodisa joyida surishtiruv olib borilib, tegishli hujjatlar rasmiylashtirilmoqda.
Termizda Spark yonib ketdi.
2021-yilning 9-dekabr kuni soat taxminan 10:15 lar chamasi Termiz shahri “Tuproqqorg‘on” mahallasi Islom Karimov ko‘chasida joylashgan chorrahada svetoforning taqiqlovchi ishorasida to‘xtab turgan haydovchi boshqaruvida bo‘lgan Spark avtomashinaning dvigatel qismida yong‘in sodir bo‘lgan.
Hodisa joyiga zudlik bilan YPX hamda Termiz shahar FVB yong‘in o‘chirish qismi xodimlari yetib kelgan. Yong‘in oqibatida avtoulov zararlangan. Tan jarohati olganlar yo‘q.
Hozirda mazkur holat yuzasidan Surxondaryo viloyati FVB Termiz shahar bo‘limi mas’ul xodimlari tomonidan surushtiruv ishlari olib borilmoqda.
Gentra 73 yoshli velosipedchi o‘limiga sababchi bo‘ldi.
Farg‘ona viloyati Qo‘shtepa tumanida 6-dekabr kuni kech soat 20:30 larda 4K-864 avtomobil yo‘lining 4-kilometrida Gentra avtomobili haydovchisi o‘zi bilan bir yo‘nalishda ketayotgan velosipedchini urib yuborgan.
Oqibatda 73 yoshli fuqaro voqea joyida halok bo‘lgan.
Hozirda tezkor-tergov guruhi voqea tafsilotlarini o‘rganmoqda.
Zominda “Jiguli” va Damas to‘qnashdi.
2021-yil 4-dekabr kuni soat 13:30 larda Zomin tumanidan o‘tgan 4R-40 Qashqobod–Zomin–Supa–Baxmal avtomobil yo‘lining 16-kilometrida shu tumanda yashovchi haydovchi “VAZ-2106” avtomobilini metan gaz quyish shoxobchasidan harakatlanib chiqayotib asosiy yo‘ldan harakatlanib kelayotgan Damas avtomashinasi bilan to‘qnashgan.
Oqibatda “VAZ-2106” haydovchisi tan jarohati olib shifoxonaga yotqizilgan.
Olmazorda Orlando yonib ketdi.
Dastlabki ma’lumotlarga ko‘ra, 2021-yil 8-dekabr kuni soat 18:50 larda Toshkent shahar, Olmazor tumani, Nurafshon va Qorasaroy ko‘chalari kesishgan chorrahada, haydovchi (1976-yilda tug‘ilgan) K.X. boshqaruvidagi Orlando avtomobilining dvigatel qismida yong‘in yuzaga kelgan. Haydovchi zudlik bilan to‘xtab, avtomobildan tushgan.
Yong‘in o‘t o‘chiruvchilar tomonidan bartaraf etilgan. Yong‘in natijasida tan jarohati olgan fuqarolar yo‘q.
Mazkur hodisa yuzasidan Olmazor tumani FVB va YHXB xodimlari tomonidan surishtiruv olib borilmoqda.
Izoh (0)