O‘zbekistonda so‘nggi kunlarda sodir bo‘lgan YTHlar oqibatida 5 kishi vafot etdi, 3 nafari jarohat oldi

O‘zbekiston yo‘llarida sodir bo‘lgan hodisalar haqida batafsil ma’lumotlar taqdim etamiz.

Yunusobodda Nexia-3 voyaga yetmagan bolani urib yubordi.

Toshkent shahar Yunusobod tumanida 3-dekabr kuni soat 17:00 da Iftixor va Sharof Rashidov ko‘chalari kesishmasida Nexia-3 avtomobil haydovchisi D.B. (1987-yilda tug‘ilgan) voyaga yetmagan piyodani urib yuborgan.

YTH oqibatida piyoda M.A. (2006-yilda tug‘ilgan) badan shikastlari bilan avtomobil haydovchisi tomonidan tibbiyot muassasasiga olib borilgan.

Mazkur fakt bo‘yicha tergov oldi tekshiruvi o‘tkazilmoqda, uning natijalariga ko‘ra qonuniy chora ko‘rilishi ma’lum qilingan.

Qashqadaryoda Lacetti qarama-qarshi yo‘nalishdan kelayotgan “KamAZ” bilan to‘qnashdi.

Qashqadaryo viloyatida Lacetti avtomobili oldindagi avtobusni quvib o‘tish maqsadida qarama-qarshi yo‘nalishga o‘tib ketgan va to‘g‘risidan kelgan “KamAZ” bilan to‘qnashgan.

YTH oqibatida Lacetti’dagi 2 nafar yo‘lovchi halok bo‘lgan, haydovchi va yana bir yo‘lovchi tan jarohati olib shifoxonaga yotqizilgan.

Aniqlanishicha, vafot etgan shaxslar aka-uka bo‘lgan.

Denovda “Jiguli” piyodani o‘limiga sababchi bo‘ldi

2021-yil 4-dekabr kuni kechki soat 20:30 larda Surxondaryo viloyati Denov tumanida “Totuvlik” mahallasidan o‘tgan avtomobil yo‘lida “VAZ 2106” qatnov qismini kesib o‘tayotgan piyodani urib yuborgan.

Piyoda olgan tan jarohati oqibatida shifoxonada vafot etgan.

Sho‘rchi tumanida ikki Damas to‘qnashishi oqibatida yo‘lovchi halok bo‘ldi.

2021-yil 6-dekabr kuni Surxondaryo viloyati Sho‘rchi tumanida o‘tgan M-41 avtomobil yo‘lining 1503-kilometrida Damas qarama-qarshi yo‘nalishdan kelayotgan boshqa Damas avtomashinasi bilan to‘qnashgan.

To‘qnashuv oqibatida avtomobillarning birida yo‘lovchi sifatida ketayotgan 25 yoshli fuqaro tan jarohati olib vafot etgan.

Voqea yuzasidan tergov-surishtiruv harakatlari olib borilmoqda.

Mirzo Ulug‘bek tumanida Spark yonib ketdi.

Dastlabki ma’lumotlarga ko‘ra, 2021-yil 7-dekabr kuni soat 19:40 larda, Toshkent shahar, Mirzo Ulug‘bek tumani, KXAY ko‘chasida haydovchi J.M. (1990-yilda tug‘ilgan) Spark avtomobilda harakatlanayotib boshqaruvni yo‘qotgan va yo‘l chetidagi ustunga urilgan. Zarb oqibatida avtomobilda yong‘in yuzaga kelgan.

Yong‘in o‘t o‘chiruvchilar tomonidan bartaraf etilgan. Hodisa natijasida tan jarohati olgan fuqarolar yo‘q.

Mazkur holat yuzasidan Toshkent shahar IIBB YHXB xodimlari tomonidan surishtiruv olib borilmoqda.

Qarshida Howo yuk mashinasi va Tico to‘qnashdi.

2021-yil 6-dekabr kuni soat 14:20 larda, Qashqadaryo viloyati, Qarshi shahar, Amir Temur ko‘chasida haydovchi R.R. (1935-yilda tug‘ilgan) Tico avtomobilda harakatlanayotib, o‘zi bilan bir yo‘nalishda, yon qatorda bo‘lgan haydovchi, 1963-yilda tug‘ilgan M.T. boshqaruvidagi Howo yuk avtomobilining yo‘liga chiqib ketishi oqibatida to‘qnashuv sodir bo‘lgan.

YTH natijasida tan jarohati olgan fuqarolar yo‘q.

Hodisa yuzasidan Qarshi shahar IIO FMB YHXB xodimlari tomonidan surishtiruv olib borilmoqda.

Sergelida 8 ta mashina ishtirokida YTH sodir bo‘ldi.

Toshkent shahri, Sergeli tumani, Mehrigiyo ko‘chasida 6-dekabr kuni soat 12:30 larda 8 ta avtomashina ishtirokida YTH sodir bo‘ldi. Voqea oqibatida Cobalt haydovchisi jarohat olgan va shifoxonaga olib ketilgan.

Voqeaga svetoforga yaqinlashgan sement tashuvchi yuk mashinasining tormozi tizimidagi nosozlik sabab bo‘lgan. Oqibatda yuk mashinasi Cobalt avtomobiliga borib urilgan va svetoforda turgan boshqa avtomobillarga zarar yetkazgan.

Bundan tashqari, 6-dekabr kuni Sergeli tumanida yuk mashinasi ishtirokida yana bir YTH sodir bo‘ldi. Unda Mercedes-Benz yuk mashinasi va Nexia-3 avtomobili to‘qnashgan.

Voqeaga Nexia-3 haydovchisi o‘z yo‘lidan harakatlanib kelayotgan yuk mashinasiga yo‘l bermagani sabab bo‘lgan.