Jizzaxning Mirzacho‘l tumani, Gagarin shaharchasida atrofi betonlab yuborilgan daraxtlar tuproq yerga ko‘chirib o‘tqazildi. Bu haqda Ekologiya va atrof-muhitni muhofaza qilish davlat qo‘mitasi xabar berdi.
Eslatib o‘tamiz, ijtimoiy tarmoqlarda daraxtlar atrofi betonlangani haqida lavhalar tarqalgandi. Holat Ekologiya qo‘mitasi Jizzax viloyati boshqarmasi tomonidan o‘rganilib, “Do‘stlik” MFY, Xalqlar do‘stligi ko‘chasining ikki tomoniga ekilgan 75 tup daraxt atrofi “Fayz-Baraka” MChJ tomonidan yo‘lak qurish ishlari davomida betonlab yuborilgani aniqlangandi. MChJning ushbu ishga yo‘l qo‘ygan xodimlariga nisbatan rasmiy bayonnoma rasmiylashtirilib, jarima belgilangan.
Daraxtlarning barchasi: 38 tup archa, 7 tup yasin, 1 tup tut, 1 tup akatsiya, 1 tup gilos, 4 tup qayrag‘och, 7 tup Eldar navli qarag‘ay, 12 tup aylan daraxtlarining tagidagi betonlar buzib olinib, tagi yumshatilib, parvarish qilingan.
5-dekabr kuni viloyat Ekologiya va atrof-muhitni muhofaza qilish boshqarmasi tashabbusi bilan beton ariq yoqasidagi tuproq yerga ko‘chirib o‘tqazilgan, ko‘chirish imkoni bo‘lmagan ko‘p yillik daraxtlar tagi yumshatilgan.
Izoh (0)