Qashqadaryo viloyat sudi raisi Abduqayum Mahkamov viloyatdagi sud jarayonlarida sudyalar tomonidan OAV vakillari faoliyatiga to‘siq qo‘yilishi sababini ochiqladi, deya xabar berdi “Daryo” muxbiri.
Qayd etilishicha, Qarshi shahridagi Jurnalistlar uyida viloyat sudi raisi Abduqayum Mahkamov ishtirokida jurnalist va blogerlar uchun matbuot anjumani tashkil etilgan.
Matbuot anjumanida so‘z olgan “Daryo” muxbiri viloyatdagi aksariyat sud jarayonlarida, ayniqsa viloyat Jinoyat sudida bo‘lib o‘tayotgan sud majlislarida OAV vakillarining erkin faoliyat yuritishi uchun to‘siq qo‘yilayotganini, sud jarayonlarini yoritish istagida bo‘lgan OAV vakillarining foto, video hamda audiomateriallar olishiga taqiq qo‘yilib, OAV vakillari ham oddiy ishtirokchi kabi sudda kuzatuvchi bo‘lib qolayotganini bildirdi. Va viloyat sudi raisiga 2021-yil 28-iyul kuni qabul qilingan “Sudlar to‘g‘risida”gi qonunda sud jarayonlarida OAV vakillarining foto, video hamda audiomateriallar to‘plashiga hech qanday to‘siq yo‘qligi belgilangan bir paytda Qashqadaryoda kuzatilayotgan bunday jarayonlarga qanday baho berasiz”, degan savol bilan yuzlandi.
Mazkur savolga javob bergan viloyat sudi raisi Abduqayum Mahkamov sud jarayonlariga chaqirilgan OAV vakillari sudga chaqirgan tomon manfaatini himoya qilishini aytib, shu sababdan ham sudyalar tomonidan OAV vakillari faoliyatiga to‘siq qo‘yilayotgan bo‘lishi mumkinligini ta’kidladi. Viloyat sudi raisining mazkur javobi tadbirda ishtirok etayotgan jurnalist va blogerlar e’tiroziga sabab bo‘ldi.
Bloger Umid Karimov viloyat sudi raisi jurnalistlarning xolisligiga shubha qilayotgan paytda qolganlardan umid yo‘qligini aytgan bo‘lsa, Azizbek Yazdurdiyev OAV vakillari sud jarayonini yoritishda xatoga yo‘l qo‘yadigan bo‘lsa, sudyalar ayab o‘tirmasligini qo‘shimcha qildi. Qolgan OAV vakillari ham qonunda belgilangan talabning sudyalar tomonidan bajarilmasligi mantiqsizlik ekanini bildirdi.
Eslatib o‘tamiz, “Daryo” muxbiri viloyatdagi sud jarayonlarini yoritishda bunday to‘siqlarga bir necha marotaba duch kelgan. Jinoyat ishlari bo‘yicha G‘uzor tumani sudida qatnashish istagida bo‘lgan “Daryo” muxbiri karantin sabab sudga kiritilmagan bo‘lsa, Jinoyat ishlari bo‘yicha Chiroqchi tuman sudi sudyasi O‘ktam Rasulov raisligida ko‘rib chiqilgan ishda muxbirning video hamda audioyozuv olishiga ruxsat etilmagandi.
Izoh (0)