«Судга чақирилган журналист чақирган томон манфаатини ҳимоя қилади-да». Қашқадарё вилоят суди раиси вилоятдаги суд жараёнларида ОАВ вакиллари фаолиятига тўсиқ қўйилишини изоҳлади

Қашқадарё вилоят суди раиси Абдуқаюм Маҳкамов вилоятдаги суд жараёнларида судьялар томонидан ОАВ вакиллари фаолиятига тўсиқ қўйилиши сабабини очиқлади, дея хабар берди «Дарё» мухбири.

Қайд этилишича, Қарши шаҳридаги Журналистлар уйида вилоят суди раиси Абдуқаюм Маҳкамов иштирокида журналист ва блогерлар учун матбуот анжумани ташкил этилган.

Матбуот анжуманида сўз олган «Дарё» мухбири вилоятдаги аксарият суд жараёнларида, айниқса вилоят Жиноят судида бўлиб ўтаётган суд мажлисларида ОАВ вакилларининг эркин фаолият юритиши учун тўсиқ қўйилаётганини, суд жараёнларини ёритиш истагида бўлган ОАВ вакилларининг фото, видео ҳамда аудиоматериаллар олишига тақиқ қўйилиб, ОАВ вакиллари ҳам оддий иштирокчи каби судда кузатувчи бўлиб қолаётганини билдирди. Ва вилоят суди раисига 2021 йил 28 июль куни қабул қилинган «Судлар тўғрисида»ги қонунда суд жараёнларида ОАВ вакилларининг фото, видео ҳамда аудиоматериаллар тўплашига ҳеч қандай тўсиқ йўқлиги белгиланган бир пайтда Қашқадарёда кузатилаётган бундай жараёнларга қандай баҳо берасиз», деган савол билан юзланди.

Мазкур саволга жавоб берган вилоят суди раиси Абдуқаюм Маҳкамов суд жараёнларига чақирилган ОАВ вакиллари судга чақирган томон манфаатини ҳимоя қилишини айтиб, шу сабабдан ҳам судьялар томонидан ОАВ вакиллари фаолиятига тўсиқ қўйилаётган бўлиши мумкинлигини таъкидлади. Вилоят суди раисининг мазкур жавоби тадбирда иштирок этаётган журналист ва блогерлар эътирозига сабаб бўлди.

Блогер Умид Каримов вилоят суди раиси журналистларнинг холислигига шубҳа қилаётган пайтда қолганлардан умид йўқлигини айтган бўлса, Азизбек Яздурдиев ОАВ вакиллари суд жараёнини ёритишда хатога йўл қўядиган бўлса, судьялар аяб ўтирмаслигини қўшимча қилди. Қолган ОАВ вакиллари ҳам қонунда белгиланган талабнинг судьялар томонидан бажарилмаслиги мантиқсизлик эканини билдирди.

Эслатиб ўтамиз, «Дарё» мухбири вилоятдаги суд жараёнларини ёритишда бундай тўсиқларга бир неча маротаба дуч келган. Жиноят ишлари бўйича Ғузор тумани судида қатнашиш истагида бўлган «Дарё» мухбири карантин сабаб судга киритилмаган бўлса, Жиноят ишлари бўйича Чироқчи туман суди судьяси Ўктам Расулов раислигида кўриб чиқилган ишда мухбирнинг видео ҳамда аудиоёзув олишига рухсат этилмаганди.