Korrupsiyaga qarshi kurashish agentligi direktori Akmal Burhonov Toshkent shahar hokimligiga Mercedes-Benz sovg‘a qilinishida qonun buzilishi bo‘lmaganini aytdi. Bu haqda “Xabar.uz” ma’lum qildi.
Toshkent shahrida Latipova Ziyoda ismli ayol o‘zining Mercedes-Benz S500 Hybrid mashinasini shahar hokimligiga tekinga bergandi. Korrupsiyaga qarshi kurashish agentligi ushbu beg‘araz sovg‘a yuzasidan xizmat tekshiruvi o‘tkazilayotgani, natijasi bo‘yicha rasmiy ma’lumot berilishini bildirgandi.
3-dekabr kuni Hilton mehmonxonasida o‘tkazilgan “Korrupsiyaga qarshi kurashish va shaffoflik bo‘yicha Toshkent forumi”da jurnalistlarning bu boradagi savoliga javob bergan Korrupsiyaga qarshi kurashish agentligi direktori Akmal Burhonov Toshkent shahar hokimligiga qora rangli Mercedes-Benz sovg‘a qilingani tekshirib ko‘rilgani va hech qanday qonun buzilishi bo‘lmaganini ta’kidlab o‘tgan.
Shuningdek, uning aytishicha, “Davlat fuqarolik xizmati to‘g‘risida”gi qonun loyihasida “sovg‘a” tushunchasiga aniqlik kiritilib, davlat xizmatchilari tomonidan sovg‘a olish va berish tartibini belgilovchi “Sovg‘a siyosati” deb nomlangan alohida bob bilan to‘ldiriladi.
Bundan tashqari, davlat organlarida korrupsiya holatlari va manfaatlar to‘qnashuvining oldini olish maqsadida qonun bilan tartibga solinadigan Davlat xizmatchilarining odob-axloq kodeksi ishlab chiqiladi va unda davlat xizmatchilari uchun cheklovlarning aniq ro‘yxati belgilanadi.
Ma’lumot uchun, Mercedes-Benz S500 Hybrid mashinalari narxi 200–300 ming dollar atrofida.
Izoh (0)