Energetika vazirligi Toshkentda suv ta’minotidagi uzilish elektr energiyasi bilan bog‘liqligini rad etdi

Energetika vazirligi Toshkentning qator hududlari 3-dekabr kuni vaqtincha suv ta’minotidan uzilib qolishi elektr energiyasi bilan bog‘liqligini rad etdi.

Eslatib o‘tamiz, Toshkentning qator hududlari 3-dekabr kuni soat 08:30 larda ichimlik suvi ta’minotidan uzilib qolgandi. “Toshkent shahar suv ta’minoti” poytaxtning asosiy qismini ichimlik suvi bilan ta’minlovchi “Qodiriya” bosh suv inshootida yuqori kuchlanishli elektr ta’minotida nosozlik yuz bergani sababli nasos agregatlarida o‘chish holati yuzaga kelganini ma’lum qilgandi.

Energetika vazirligining qayd etishicha, Toshkent aholisini suv bilan ta’minlovchi “Qodiriya” suv inshooti 3 ta bir-biriga bog‘liq bo‘lmagan elektr uzatish tarmoqlari orqali elektr energiyasi bilan ta’minlanadi. 3-dekabr kuni ushbu tarmoqlarning 2 tasida qisqa muddatli (12 daqiqa) o‘chish sodir bo‘ldi. Bu vaqtda uchinchi elektr uzatish tarmog‘i orqali “Qodiriya” suv inshooti elektr energiyasi bilan ta’minlangan.

“Shunday qilib, elektr energiyasining bu holati Toshkent aholisining suv ta’minotida uzilishlarga sabab bo‘la olmadi”, — deyiladi vazirlik xabarida.