Samarqand viloyatining Kattaqo‘rg‘on tumanida 10-iyunga o‘tar kechasi hududiy Davlat soliq inspeksiyasi boshlig‘i o‘rinbosari, 41 yoshli Azizbek Ahmedov yo‘l harakati xavfsizligi xizmati xodimlarining mashinasida vafot etgani haqida xabar berilgan edi.
Ichki ishlar vazirligining 11-iyundagi bayonotida Ahmedov YPX xodimlari tomonidan ushlanib, “o‘ta mast holatda bo‘lgani gumon qilinib, tibbiy ko‘rikdan o‘tish uchun taklif qilinganida fuqaro ichki ishlar organlari xodimlarining qonuniy talablarini bajarmasdan, faol qarshilik ko‘rsata boshlagani, shu vaqt oralig‘ida tibbiy ko‘rikka olib borish uchun transport vositasiga o‘tqazilgan fuqaroning sog‘lig‘i yomonlashib, voqea joyiga tez tibbiy yordam xizmati chaqirtirilgani, biroq ko‘rsatilgan muolajalarga qaramay, fuqaro Azizbek Ahmedov vafot etgani” ta‘kidlanadi.
IIV bayonot bilan birga, holatning bodikamerada olingan videosini ham e’lon qilgandi.
IIV ikki nafar YPX xodimining bodikamerasi orqali yozib olingan videoni ulab (montaj qilib), e’lon qilgan. Videoda xodimlar tuman DSI boshlig‘ini ushlab, Spark mashinasining orqa o‘rindig‘iga o‘tqizishga urinayotganini ko‘rish mumkin.
Ikki xodim Azizbek Ahmedovni old va orqa tomonidan mashinaga kuch bilan o‘tqizishga harakat qilgan, Azizbek Ahmedov esa ularga qarshilik qilgan. Videoning aynan shu joyida kichik uzilish bo‘lgan hamda katta serjantning o‘rniga kichik serjantning bodikamerasi orqali yozib olingan video qo‘yilishni boshlagan. Ikki nafar xodim esa hushini yo‘qotgan Azizbek Ahmedovni mashinadan tushirib, yerga yotqizgan. YPX xodimlari tez yordam chaqirgan, ular o‘zaro suhbatda Azizbek Ahmedov nafas olayotganini bir-biriga aytgan. IIV Azizbek Ahmedovni old tomondan tortib, mashinaga o‘tqizishga uringan YPX xodimining bodikamerasidagi yozuvlarni e’lon qilmagan.
Mazkur holat yuzasidan Kattaqo‘rg‘on tuman prokuraturasi tomonidan Jinoyat kodeksining 206-moddasi (hokimiyat yoki mansab vakolati doirasidan chetga chiqish) alomatlari bilan jinoyat ishi qo‘zg‘atilgan va 3-dekabr kuni jinoyat ishlari bo‘yicha Kattaqo‘rg‘on tuman sudi binosida YPX xodimlari ustidan sud olib borildi.
“Daryo” ixtiyoriga kelib tushgan sud hukmida voqea tafsilotlari keltirilgan.Ma’lum bo‘lishicha, sudlanuvchi Mehriddin Kuchkarov (1987-yilda Samarqand viloyatida tug‘ilgan, Kattaqo‘rg‘on tumani IIB yo‘l harakati xavfsizligi bo‘linmasi boshlig‘i lavozimida ishlagan) 2021-yilning 9-iyun kunidan 10-iyun kuniga o‘tar kechasi qo‘l ostida ishlovchi va xizmat yuzasidan o‘ziga bo‘ysunuvchi Kattaqo‘rg‘on tuman IIB YHXB xodimlari Shahboz Rahimberdiyev (1990-yilda Samarqand viloyatida tug‘ilgan, Samarqand viloyati IIB YHXB YPXB 4-otryad katta inspektori lavozimida ishlagan), N.Ismoilov, va Sh.Xoliqulov bilan birgalikda xizmatni o‘tashlari davomida N.Ismoilovga tegishli bo‘lgan Spark rusumli avtomashinada Kattaqo‘rg‘on tumani Payshanba shaharchasi Alisher Navoiy va Mustaqillik ko‘chasi kesishmasidagi chorrahaga kelishgan.
Soat 00:20 larda chorrahaning qarama-qarshi yo‘nalishi bo‘yicha harakatlanib kelgan, fuqaro Azizbek Ahmedov o‘zining boshqaruvidagi Cobalt rusumli avtomashinasini chorrahadagi svetoforning harakatni taqiqlovchi qizil chirog‘idan harakatni davom ettirib ketganligini ko‘rgan. Ushbu avtomashina haydovchisini to‘xtatish maqsadida uning orqasidan harakatni davom ettirib, unga yetib olishgach, o‘zlarining boshqaruvidagi Spark rusumli avtomashina bilan Azizbek Ahmedov boshqaruvidagi Cobalt rusumli avtomashinaning old tomoniga o‘tib, uning harakatlanishini cheklab, to‘xtatgan.
Keyinchalik Cobalt rusumli avtomashina haydovchisi Azizbek Ahmedovning nutqi va harakatlaridan uning mast holatdaligini bilishgach, Kattaqo‘rg‘on tuman IIB YHXB bo‘linmasi boshlig‘i Mehriddin Kuchkarov haydovchi Azizbek Ahmedovga tibbiy ko‘rikdan o‘tishni taklif qilgan.
Shunda u tibbiy ko‘rikdan o‘tishdan bosh tortgach, Mehriddin Kuchkarov va Shahboz Rahimberdiyev Vazirlar Mahkamasining 2018-yil 1-dekabrdagi 975-sonli qarori bilan tasdiqlangan “Yo‘l-patrul xizmati xodimlarining yo‘l harakati qatnashchilari bilan o‘zaro munosabatlari hamda maxsus moslamalardan foydalanishi tartibi to‘g‘risida”gi nizomning 14-bandi, 7-xatboshisida nazarda tutilgan “haydovchi mastligi yoki mast emasligini aniqlash uchun tekshiruv o‘tkazilishidan bo‘yin tovlagan taqdirda, Ma’muriy javobgarlik to‘g‘risidagi kodeksining 136-moddasida (transport vositalari haydovchilarining va yo‘l harakati boshqa ishtirokchilarining mastligi yoki mast emasligini aniqlash uchun tekshiruvdan o‘tishdan bo‘yin tovlashi) nazarda tutilgan huquqbuzarlik uchun ma’muriy bayonnoma rasmiylashtirish choralarini ko‘rmasdan, “Ichki ishlar organlari to‘g‘risida”gi qonunning 22-moddasi talablariga zid ravishda, mansabdor shaxs sifatida o‘ziga berilgan vakolatlar doirasidan chetga chiqqan.
Ular harakatlari bilan o‘ziga va atrofdagilarga ziyon yetkazishga harakat qilmagan bo‘lsa-da, haydovchi Azizbek Ahmedovga asossiz hamda maqsadga muvofiq bo‘lmagan tarzda kuch ishlatib, uni o‘zlari minib kelgan Spark rusumli avtomashinaning orqa o‘rindig‘iga majburlab joylashtirishga harakat qilgan.
Ushbu jarayonda Azizbek Ahmedov o‘ziga nisbatan kuch ishlatmaslikni va unga nisbatan qilinayotgan zo‘ravonlikdan azob chekayotganligini bildirib, buni to‘xtatishni bir-necha marta so‘ragan bo‘lishiga qaramasdan, Mehriddin Kuchkarov va Shahboz Rahimberdiyev ushbu holatda Azizbek Ahmedov o‘zida og‘riq va azob his qilayotganligini anglagan bo‘lsa-da, shunga ko‘ra uning og‘ir holatlarga tushib qolishi, shu jumladan, vafot etishi mumkinligiga jinoiy beparvolik bilan e’tibor qilmasdan, o‘zlarining noqonuniy harakatlarini davom ettirgan.
Mehriddin Kuchkarov haydovchi Azizbek Ahmedovni qo‘llarini qayirgan holda, Shahboz Rahimberdiyevning yordami bilan tanasini egib, bosib turishini davom ettirishlari natijasida, Azizbek Ahmedovda bo‘lgan yurak ishemik kasalligi kuchli hayajonlanish negizida xuruj qilib, voqea joyida vafot etgan.
Mavzuga doir: Samarqandda DSI xodimi YPX mashinasida vafot etgach, viloyat soliqchilariga mast holda avtomobil boshqarmaslik tushuntirildi
Ushbu jinoyat ishi jinoyat ishlari bo‘yicha Qo‘shrabot tuman sudi raisi I.G‘ulomov raisligida ko‘rib chiqildi.
E’lon qilingan sud hukmiga ko‘ra, Mehriddin Kuchkarov va Shahboz Rahimberdiyev Jinoyat kodeksining 102-moddasi (ehtiyotsizlik sabab odam o‘ldirish) 1-qismi va 206-moddasi (hokimiyat yoki mansab vakolati doirasidan chetga chiqish) 1-qismida nazarda tutilgan jinoyatlarni sodir etganlikda aybli deb topildi.
Sudlanuvchilar 2 yil ichki ishlar organlarida ishlash huquqidan mahrum qilinib, ularning har biriga 2 yil 10 oy muddatga ozodlikdan mahrum qilish jazosi tayinlandi. Tayinlangan jazoni manzil koloniyalarda o‘tash belgilandi.
Izoh (0)