Акмал Бурҳонов Тошкент шаҳар ҳокимлигига Mercedes-Benz совға қилинишида қонун бузилиши бўлмаганини айтди

Коррупцияга қарши курашиш агентлиги директори Акмал Бурҳонов Тошкент шаҳар ҳокимлигига Mercedes-Benz совға қилинишида қонун бузилиши бўлмаганини айтди. Бу ҳақда «Xabar.uz» маълум қилди.

Тошкент шаҳрида Латипова Зиёда исмли аёл ўзининг Mercedes-Benz S500 Hybrid машинасини шаҳар ҳокимлигига текинга берганди. Коррупцияга қарши курашиш агентлиги ушбу беғараз совға юзасидан хизмат текшируви ўтказилаётгани, натижаси бўйича расмий маълумот берилишини билдирганди.

3 декабрь куни Hilton меҳмонхонасида ўтказилган «Коррупцияга қарши курашиш ва шаффофлик бўйича Тошкент форуми»да журналистларнинг бу борадаги саволига жавоб берган Коррупцияга қарши курашиш агентлиги директори Акмал Бурҳонов Тошкент шаҳар ҳокимлигига қора рангли Mercedes-Benz совға қилингани текшириб кўрилгани ва ҳеч қандай қонун бузилиши бўлмаганини таъкидлаб ўтган.

Шунингдек, унинг айтишича, «Давлат фуқаролик хизмати тўғрисида»ги қонун лойиҳасида «совға» тушунчасига аниқлик киритилиб, давлат хизматчилари томонидан совға олиш ва бериш тартибини белгиловчи «Совға сиёсати» деб номланган алоҳида боб билан тўлдирилади.

Бундан ташқари, давлат органларида коррупция ҳолатлари ва манфаатлар тўқнашувининг олдини олиш мақсадида қонун билан тартибга солинадиган Давлат хизматчиларининг одоб-ахлоқ кодекси ишлаб чиқилади ва унда давлат хизматчилари учун чекловларнинг аниқ рўйхати белгиланади.

Маълумот учун, Mercedes-Benz S500 Hybrid машиналари нархи 200–300 минг доллар атрофида.