Dunyo va o‘zbek sportiga oid 2-dekabrning eng muhim xabarlari dayjesti bilan tanishing.
O‘zbekiston
Qudratillo Abduqahhorov ham 11-dekabrda jang qiladi
Professional boksning yarim o‘rta (-66,67 kg) vazn toifasida ringga chiqayotgan Qudratillo Abduqahhorov (18-0, 10 KO) navbatdagi jangini 2021-yilning 11-dekabrida o‘tkazadi. O‘zbekistonlik bokschiga kanadalik Kodi Krouli (19-0, 9 KO) raqib bo‘ladi.
Eslatib o‘tamiz, 11-dekabr kuni Bahodir Jalolov Dubayda, Shohjahon Ergashev esa Toshkentda jang qiladi. Hozircha ularga raqiblik qiladigan bokschilar nomi ma’lum emas.
Temur Kapedze qo‘l ostidagi “Olimpik” Superliga yo‘llanmasiga ega chiqdi
“Olimpik” 2-dekabr kuni bo‘lib o‘tgan o‘tish o‘yinida “Mash’al”ni mag‘lub etib (3:1), Superliga yo‘llanmasini qo‘lga kiritdi. Endilikda yosh o‘yinchilardan tashkil topgan “olimpiyachilar” 2022-yilgi mavsumda oliy divizionda harakat qiladi.
Mahmud Murodov UFC’dagi 5-jangini o‘tkazadi
O‘zbekistonlik yakkakurashchi 2022-yilning 26-fevral kuni bo‘lib o‘tadigan UFC oqshomida jang qiladi. Hozircha raqib kim bo‘lishi rasman tasdiqlanmagan. Xabarlarga ko‘ra, Murodov latviyalik Misha Sirkunovga qarshi oktagonga ko‘tariladi.
Jahon
Robert Levandovski “Real”ga o‘tmoqchi
Polshalik futbolchi yozda “Bavariya”ni tark etish niyatida, deya xabar qilmoqda AS. Uni “Real” klubining mashhurligi va klub ambitsiyalari o‘ziga jalb qilmoqda. Robert uzoq vaqtdan beri madridliklar safiga o‘tishni orzu qiladi. Futbolchi o‘z agenti bilan maslahatlashgan va “Real”ga o‘tish variantiga maksimal e’tibor qaratishni so‘ragan.
“Real” rahbariyati ham Levandovskiga befarq emas. Biroq Madrid klubida nisbatan yoshroq bo‘lgan Erling Holand (“Borussiya D”) varianti ham bor.
Krishtianu Ronaldu tergovga jalb etilishi mumkin
Turin prokuraturasi “Yuventus”ni yolg‘on hisobot berishda gumon qilmoqda. Turinliklarda ortda qolgan uch mavsum davomida 50 million yevro kamomad aniqlangan, deya xabar qilmoqda La Gazzetta dello Sport.
Ronalduning “Yuve” bilan moliyaviy hamkorligidagi ayrim jihatlar shubha uyg‘otgan. Avvalroq Ronaldu karantin vaqtida “Yuventus”dan qo‘shimcha to‘lov olgani xabar qilingandi.
Prokuror portugaliyalik futbolchining “Yuventus” bilan hamkorligi tafsilotlarini o‘rganish niyatida va yaqin vaqt ichida uni so‘roqqa tutish istagida.
Ralf Rangnik Angliya vizasini oldi
“Manchester Yunayted” ustozi Angliyada ishlash huquqini qo‘lga kiritdi, deya xabar qilmoqda Saymon Stoun. Shu tariqa mutaxassis Premyer Liga 15-turi doirasida 5-dekabr kuni kechadigan “Kristal Pelas”ga qarshi o‘yinga mankunianlarni o‘zi boshlab tushadi.
Eslatib o‘tamiz, Rangnik 2019-yildan beri murabbiylik bilan shug‘ullanmagani bois Buyuk Britaniya vizasiga ega chiqolmagandi. Avvalroq mutaxassis viza bilan bog‘liq muammolar sabab dekabr o‘rtalariga qadar Angliyaga bora olmasligi xabar qilingandi.
“Manchester Yunayted” Rangnik orqali Erling Holandni olib kelmoqchi. Bild xabariga ko‘ra, Rafl norvegiyalik futbolchini “Yunayted”ga o‘tishga ko‘ndira olsa, 10 million yevro miqdoridagi bonusga ega bo‘ladi.
Qayd etish kerak, Holand 18 yoshligida “Zalsburg” bilan shartnoma imzolagan vaqti Rangnik “buqalar” sport direktori edi. Shu bois Holand va nemis mutaxassisi o‘rtasidagi munosabatlar juda yaqin.
Edinson Kavani “Barselona”ga yo‘l olishi mumkin
Urugvaylik futbolchining “Manchester Yunayted” bilan amaldagi shartnomasi 2021/22-yilgi mavsum oxirida yakunlanadi. Kavani yozda katalon klubiga o‘tmoqchi. 34 yoshli futbolchi La Liga yana ikki mavsum yuqori saviyali o‘yin namoyish qila olishiga ishonmoqda.
Joriy mavsum Edinson Premyer Ligada 5 ta o‘yin o‘tkazib, bitta gol urdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)