“Bu kabi xabarlar o‘ylab topilgan uydirma va bo‘hton bo‘lishi mumkin”. “Navbahor” Andrey Kanchelskisga tahdid qilingani bilan bog‘liq vaziyat yuzasidan bayonot berdi

2021-yilning 1-dekabr kuni “Navbahor” klubi sobiq bosh murabbiyi Andrey Kanchelskis noma’lum kimsalar tomonidan tahdid bo‘lganini aytib, politsiyaga murojaat qilgani haqida ma’lumotlar tarqaldi. Mutaxassisga ko‘ra, mazkur shaxslar Kanchelskisning “Navbahor” jamoasiga qo‘yayotgan moliyaviy talablarni kamaytirishni qat’iy so‘ragan.

Ushbu xabar yuzasidan “Navbahor” futbol klubi rasmiy bayonot berdi. Unda “Navbahor” “1,6 million dollar kompensatsiya” qarori yuzasidan berilgan apellyatsiyada yutib chiqishga yaqin ekani, shu bois rossiyalik mutaxassis CAS’da o‘zini oqlash uchun turli uydirma va bo‘htonlar o‘ylab topayotgan bo‘lishi mumkinligi aytib o‘tilgan.

1-dekabr kuni Rossiya va O‘zbekistonning sportga ixtisoslashgan aksariyat internet nashrlari hamda ijtimoiy tarmoqlarida “rossiyalik murabbiy Andrey Kanchelskisga noma’lum shaxslar tomonidan tahdid qilingani va mutaxassis ushbu masala yuzasidan politsiyaga murojaat etgani” bilan bog‘liq ma’lumotlarning tarqalishi futbol jamoatchiligi tomonidan turlicha qabul qilindi, hattoki, ayrimlarda noo‘rin shubha va yanglish tasavvur paydo bo‘lishiga sabab bo‘ldi, ayniqsa, “Navbahor” jamoasi muxlislarining ko‘pchiligida xavotir uyg‘otdi.

Shu munosabat bilan “Navbahor” professional futbol klubi mazkur holat bo‘yicha shuni ma’lum qiladiki, joriy yil avgust oyida FIFA tomonidan “...Andrey Kanchelskisga 1,6 million dollar miqdorida kompensatsiya puli to‘lab berish...” yuzasidan chiqarilgan qaror bo‘yicha “Navbahor” Xalqaro sport arbitraj sudiga (CAS) apellyatsiya yo‘llagan. Ushbu jarayonda “Navbahor” tomonidan CAS’ga taqdim etilgan dalil-isbotlar sud ishida yutib chiqish imkonini beradi.

Andrey Kanchelskis shaxsi bilan bog‘liq bu kabi ma’lumotlarning internet nashrlari va ijtimoiy tarmoqlarda tarqatilishi rossiyalik mutaxassisning kelgusida CAS’da o‘zini oqlash uchun qilinayotgan, o‘z navbatida, “Navbahor”ga qarshi foydalanish uchun o‘ylab topilgan uydirma va bo‘htonlar bo‘lishi mumkinligini ham inobatga olish darkor.

“Navbahor” va klub manfaatlarini himoya qilayotgan yuristlar ushbu hodisadan ancha oldin xabardor edi. Chunki Andrey Kanchelskisning yuristlari hodisa bo‘yicha “Navbahor” yuristlari bilan bog‘langanda, “Navbahor” bu hodisadan xabari yo‘qligini, lekin holat yuzasidan har qanday yordam berishga tayyorligini ma’lum qilgandi.

“Navbahor”ga aloqador har qanday voqea-hodisaga yuridik jihatdan to‘g‘ri yondashishga, mavjud masalalarni qonuniy tomonlama hal etishga harakat qilib keladi, bundan keyin ham shunday bo‘lib qoladi.

“Navbahor” PFK matbuot xizmati.

“Navbahor” sobiq murabbiyi “Match TV”ga bergan intervyusida Namangan shahri jamoasi bilan bog‘liq muammolar haqida so‘zlab bergandi.