Mahmud Murodovning navbatdagi jangi sanasi va raqibi nomi ma’lum bo‘ldi

O‘zbekistonlik yakkakurashchi Mahmud Murodov (25-7) UFC’dagi beshinchi jangini 2022-yilning 26-fevralida (Toshkent vaqti bilan 27-fevral) o‘tkazadi. Bu haqda sportchi o‘zining Instagram sahifasi orqali ma’lum qildi.

O‘zbekistonlik yakkakurashchi AQShning Las-Vegas shahrida o‘tkaziladigan UFC musobaqasida kimga qarshi jang qilishi rasman ma’lum qilinmagan. Xabarlarga ko‘ra, Murodovga latviyalik Misha Sirkunov (15-7) raqib bo‘ladi.

Mazkur UFC oqshomining asosiy jangi yengil vazn toifasi vakillari Islom Maxachev (21-1) va Beneil Dariush (21-1-4) o‘rtasida kechadi.

Murodov oxirgi jangini 2021-yilning avgust oyida Jerald Mirshertga (33-14) qarshi o‘tkazib, UFC’dagi ilk mag‘lubiyatini qabul qilib olgandi.

Ma’lumot uchun, Murodov UFC’dagi debyut jangida italiyalik Alessio di Kirikoni (13-5) ochkolar hisobiga ko‘ra, ikkinchi jangida Trevor Smit (15-10), uchinchisida esa Endyu Sanchesni (12-6) nokaut evaziga mag‘lubiyatga uchratgandi.

Misha Sirkunov oxirgi ikki jangini 2021-yilda o‘tkazib, ularda Rayan Spenn va Kshishtof Yotkoga mag‘lub bo‘lgan.