Дунё ва ўзбек спортига оид 2 декабрнинг энг муҳим хабарлари дайжести билан танишинг.
Ўзбекистон
Қудратилло Абдуқаҳҳоров ҳам 11 декабрда жанг қилади
Профессионал бокснинг ярим ўрта (-66,67 кг) вазн тоифасида рингга чиқаётган Қудратилло Абдуқаҳҳоров (18-0, 10 КО) навбатдаги жангини 2021 йилнинг 11 декабрида ўтказади. Ўзбекистонлик боксчига канадалик Коди Кроули (19-0, 9 КО) рақиб бўлади.
Эслатиб ўтамиз, 11 декабрь куни Баҳодир Жалолов Дубайда, Шоҳжаҳон Эргашев эса Тошкентда жанг қилади. Ҳозирча уларга рақиблик қиладиган боксчилар номи маълум эмас.
Темур Капедзе қўл остидаги «Олимпик» Суперлига йўлланмасига эга чиқди
«Олимпик» 2 декабрь куни бўлиб ўтган ўтиш ўйинида «Машъал»ни мағлуб этиб (3:1), Суперлига йўлланмасини қўлга киритди. Эндиликда ёш ўйинчилардан ташкил топган «олимпиячилар» 2022 йилги мавсумда олий дивизионда ҳаракат қилади.
Маҳмуд Муродов UFC’даги 5-жангини ўтказади
Ўзбекистонлик яккакурашчи 2022 йилнинг 26 февраль куни бўлиб ўтадиган UFC оқшомида жанг қилади. Ҳозирча рақиб ким бўлиши расман тасдиқланмаган. Хабарларга кўра, Муродов латвиялик Миша Циркуновга қарши октагонга кўтарилади.
Жаҳон
Роберт Левандовски «Реал»га ўтмоқчи
Польшалик футболчи ёзда «Бавария»ни тарк этиш ниятида, дея хабар қилмоқда АС. Уни «Реал» клубининг машҳурлиги ва клуб амбициялари ўзига жалб қилмоқда. Роберт узоқ вақтдан бери мадридликлар сафига ўтишни орзу қилади. Футболчи ўз агенти билан маслаҳатлашган ва «Реал»га ўтиш вариантига максимал эътибор қаратишни сўраган.
«Реал» раҳбарияти ҳам Левандовскига бефарқ эмас. Бироқ Мадрид клубида нисбатан ёшроқ бўлган Эрлинг Ҳоланд («Боруссия Д») варианти ҳам бор.
Криштиану Роналду терговга жалб этилиши мумкин
Турин прокуратураси «Ювентус»ни ёлғон ҳисобот беришда гумон қилмоқда. Туринликларда ортда қолган уч мавсум давомида 50 миллион евро камомад аниқланган, дея хабар қилмоқда La Gazzetta dello Sport.
Роналдунинг «Юве» билан молиявий ҳамкорлигидаги айрим жиҳатлар шубҳа уйғотган. Аввалроқ Роналду карантин вақтида «Ювентус»дан қўшимча тўлов олгани хабар қилинганди.
Прокурор португалиялик футболчининг «Ювентус» билан ҳамкорлиги тафсилотларини ўрганиш ниятида ва яқин вақт ичида уни сўроққа тутиш истагида.
Ралф Рангник Англия визасини олди
«Манчестер Юнайтед» устози Англияда ишлаш ҳуқуқини қўлга киритди, дея хабар қилмоқда Саймон Стоун. Шу тариқа мутахассис Премьер Лига 15-тури доирасида 5 декабрь куни кечадиган «Кристал Пэлас»га қарши ўйинга манкунианларни ўзи бошлаб тушади.
Эслатиб ўтамиз, Рангник 2019 йилдан бери мураббийлик билан шуғулланмагани боис Буюк Британия визасига эга чиқолмаганди. Аввалроқ мутахассис виза билан боғлиқ муаммолар сабаб декабрь ўрталарига қадар Англияга бора олмаслиги хабар қилинганди.
«Манчестер Юнайтед» Рангник орқали Эрлинг Ҳоландни олиб келмоқчи. Билд хабарига кўра, Рафл норвегиялик футболчини «Юнайтед»га ўтишга кўндира олса, 10 миллион евро миқдоридаги бонусга эга бўлади.
Қайд этиш керак, Ҳоланд 18 ёшлигида «Зальцбург» билан шартнома имзолаган вақти Рангник «буқалар» спорт директори эди. Шу боис Ҳоланд ва немис мутахассиси ўртасидаги муносабатлар жуда яқин.
Эдинсон Кавани «Барселона»га йўл олиши мумкин
Уругвайлик футболчининг «Манчестер Юнайтед» билан амалдаги шартномаси 2021/22 йилги мавсум охирида якунланади. Кавани ёзда каталон клубига ўтмоқчи. 34 ёшли футболчи Ла Лига яна икки мавсум юқори савияли ўйин намойиш қила олишига ишонмоқда.
Жорий мавсум Эдинсон Премьер Лигада 5 та ўйин ўтказиб, битта гол урди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)