Xalq ta’limi tizimida so‘nggi 11 oyda 27,5 mlrd so‘mlik o‘g‘irlik va kamomad aniqlangan

O‘zbekiston Xalq ta’limi vazirligida 2021-yil boshidan hozirgi kunga qadar jami 88 milliard so‘mlik moliyaviy xato-kamchiliklar aniqlangan, deb xabar beradi O‘zA.

Xalq ta’limi vaziri o‘rinbosari Temur Komilovning so‘zlariga ko‘ra, vazirlik faoliyatida moliyaviy xato va kamchiliklarni oldini olish bo‘yicha bir qancha loyihalar, platformalar amalga oshirilmoqda. Xususan, 2021-yilning 11 oyi davomida jami 368,6 milliard so‘mlik moliyaviy xato va kamchiliklarning oldi olinishiga va bartaraf etilishiga erishilgan.

Tarkibida jinoyat alomatlari bo‘lgan 159 ta 72,9 milliard so‘mlik o‘rganish materiallari huquqiy baho berish va qonuniy choralar ko‘rish maqsadida huquq-tartibot organlariga taqdim etilgan.

Bundan tashqari, vazirlikning Nazorat-huquqiy xizmati tomonidan korrupsiyaga qarshi kurashish borasida amalga oshirilayotgan ishlar bo‘yicha ham batafsil ma’lumot berilgan.

“Hozirga qadar sohada yo‘l qo‘yilgan xato va kamchiliklar yuzasidan 243 nafar rahbar xodimlar egallab turgan lavozimlaridan ozod etilgan, 3 ming 415 nafariga nisbatan intizomiy jazo choralari ko‘rilgan, 151 ta holat bo‘yicha to‘plangan materiallar huquq-tartibot idoralariga yuborilgan”, – deydi Xalq ta’limi vazirligining Nazorat-huquqiy xizmati boshlig‘i Iskandar To‘rayev.

Shuningdek, o‘tgan davr davomida vazirlik tomonidan 264 ming 41 nafar xodim huquqlari himoya qilinib, 963 nafarining huquqi tiklangan bo‘lsa, 188 ta holatda boshqa davlat organlari tomonidan faoliyatga noqonuniy aralashuv va tekshiruvlarning oldi olingan.

Avvalroq O‘zbekiston maktablariga qabul qilishdagi korrupsiyaviy xavflar ma’lum qilingan edi. Ular asosan, mikrohududlarning kvota tizimi, maktab binosining yetishmasligi (sinflarda o‘quvchilari soni me’yoridan oshib ketishi), 1-sinfga qabul qilishda ta’lim tili bo‘yicha aniq talablar yo‘qligi, ta’lim sifati pastligi kabi muammolar bilan bog‘liq.