O‘zbekistonning Jinoyat kodeksiga korrupsiyaga oid jinoyatlar uchun javobgarlik choralarini kuchaytirishni nazarda tutuvchi qonun loyihasi Oliy Majlis Qonunchilik palatasiga kiritildi. Bu haqda agentlik direktori Akmal Burhonov ma’lum qildi.
Ma’lum qilinishicha, Jinoyat kodeksi loyihasida “korrupsiyaga oid jinoyatlar” tushunchasiga aniq ta’rif berilmoqda va 15 turdagi jinoyatlar bu toifaga kiritilmoqda. Muhim o‘zgarish sifatida korrupsiyaga oid jinoyatlar uchun jazo choralari keskin kuchaytirilmoqda.
Endilikda, o‘zlashtirish, rastrata qilish yo‘li bilan talon-toroj qilish,firibgarlik jinoyatlarini mansab mavqeyini suiiste’mol qilish yoki xizmat mavqeyidan foydalanib sodir etish qilmishlari uchun 10 yilgacha (ilgari 5 yilgacha) ozodlikdan mahrum qilish jazosi kiritilmoqda.
Shuningdek, pora olish, pora berish va pora olish-berishda vositachilik qilish jinoyatlari uchun 20 yilgacha ozodlikdan mahrum qilish jazosi belgilanmoqda.
“Eng asosiysi, poraxo‘rlik jinoyatlarini sodir etgan shaxslar jazoni o‘tashdan muddatidan ilgari shartli ozod qilinmasligi va jazo yengilrog‘i bilan almashtirilmasligi va boshqa qator dolzarb o‘zgartish va qo‘shimchalar kiritilmoqda”, — deb yozadi Burhonov.
Avvalroq O‘zbekistonda korrupsion jinoyatlarni sodir etgan shaxslarning reyestri to‘g‘risidagi qonun qabul qilinishi, O‘zbekistonda korrupsionerlar “qora ro‘yxati” shakllantirilishi va ushbu ro‘yxatga tushgan shaxslar qator huquqlardan mahrum etilishi haqida xabar berilgandi.
Izoh (0)