2001-yilda “Ameli” filmi ekranlarda namoyish etilgach, Odri Totu dunyo bo‘ylab millionlab odamlarning sevimli aktrisasiga aylandi. Asta-sekin aktrisaga taqlid qilish va uning tashqi ko‘rinishini takrorlaydiganlar soni ortib bordi. Shuningdek, odamlar bu g‘ayrioddiy aktrisa haqida imkon qadar ko‘proq ma’lumotga ega bo‘lishga harakat qildi. O‘sha vaqtdan boshlab Odri fransuz uslubining timsoliga aylandi. Biroq sayyoraning turli burchaklaridan muxlislar qalbini zabt etgan aktrisa go‘yoki birdan ularning ko‘z o‘ngida g‘oyib bo‘ldi. Aslida bu unchalik ham to‘g‘ri emasdi: Odri qattiq mehnat qildi, 26 ta filmda rol ijro etdi, ularning orasida “Da Vinchi kodi” va “Koko do Shanel” kartinalari ham mavjud.
Karyeraning boshlanishi
Odri Totu 1976-yil 9-avgustda Fransiyaning kichik Bomon shahrida tug‘ilgan, bolaligi esa Monlyuson shahrida o‘tgan. Uning otasi Bernard Totu tish shifokori, onasi Evelin Totu esa Monlyuson aglomaretsiyasining vitse-prezidenti vazifasida faoliyat yuritgan. Ular qizini aktrisa Odri Xepbyorn sharafiga nomlagan.
Kichkintoy Odri Eyfel minorasiga juda qiziqar edi. U minora qanchalik baland ekanligini tushunishga harakat qilardi. Totu bu masalada hatto ota-onasini aqldan ozdirganini ham aytib o‘tgan: u shahardagi barcha binolarni ko‘rsatar va “Nahotki minora haqiqatan ham bu binodan baland bo‘lsa? Shunday bo‘lsa, qancha baland?” kabi savollar berardi.
Ko‘ngilochar maskanlarni Odri to o‘smirlik yoshiga qadar yoqtirmadi. U ko‘proq hayvonlarga g‘amxo‘rlik qilishni va odamlarga yordam berishni xohladi. Kino sanoatiga qiziqishning tug‘ilishi uni haftada bir necha marta kinoteatrga olib borgan onasi tufayli boshlandi. Shunday qilib, Odri barcha yangiliklardan xabardor bo‘lardi. Ammo o‘shanda ham u aktrisa bo‘lmoqchi emasdi, lekin uning e’tiborini film va spektakllar sahnalashtirish bilan bog‘liq bo‘lgan hamma narsa o‘ziga tortdi: sahna, libos, dekoratsiya...
Shuningdek, dugonasining taklifi bilan aktrisalikka qiziqib qoldi. Keyinchalik, uning bakalavr darajasini muvaffaqiyatli tugatganligi sharafiga ota-onasi unga Parijdagi nufuzli teatr maktabida 2 haftalik yozgi kursni taqdim etdi. U yerda Odriga qolish taklifi bildirildi. Bundan tashqari, Totu Parij Sorbonna universitetida adabiyot bo‘yicha tahsil oldi. Avvaliga ota-ona qizining aktrisa bo‘lishiga shubha qildi, lekin teatr maktabining o‘qituvchilari uni qobiliyatli talaba sifatida maqtadi, shundan keyin ular qizining tanlovini qo‘llab-quvvatladi.
Ameli roli
Film ijodkorlari tomonidan ushbu rol dastlab Vanessa Paradisga taklif qilingan, biroq u rad javobini bergan. Odri Totu rejissorning taklifiga binoan sinovdan o‘tgan va Ameli Pulen rolini ijro etish unga nasib qilgan.
Odri film namoyishidan keyingi erishilgan muvaffaqiyatni bo‘ronga qiyoslaydi. Aktrisaning so‘zlariga ko‘ra, uning o‘zi hech qanaqasiga o‘zgarmagan, atrofidagilari haqida esa gapira olmaydi. Ammo odamlar unga oddiy, avvalgidek qarashni to‘xtatgan va bu Odri uchun juda g‘alati tuyulgan.
Ameli obrazi Totuni butun dunyoga mashhur qildi va yangi moda yo‘nalishiga asos soldi. Premyeradan bir necha yil o‘tgan bo‘lsa ham, qizlar sartaroshdan “Ameli” komediyasidagi fransuzcha bob kare turmagini so‘raydi.
Butun dunyo bo‘ylab muvaffaqiyatga erishgandan keyingi hayot va karyera
Odri Totu ijtimoiy tarmoqlardan foydalanmaydi, u ataylab bo‘lsa-da, har qanday oshkoralikdan qochadi. U hatto bir marotaba hayotining tafsilotlari bilan bo‘lishishdan ko‘ra Oyga ko‘chishni afzal ko‘rishini aytib o‘tgan. Aktrisaning fikricha, internetda har kim o‘z fikriga ega va u bundan xalos bo‘lishni xohlaydi.
Odri internetdagi fotosuratlarning 90 foizini o‘z-o‘zini reklama qilish deb biladi, shuningdek, ularda ishtirok etishni hamda brend bo‘lishni ham xohlamaydi. Ajablanarlisi shundaki, aktrisa hattoki bir soatda hamma uni unutib qo‘yishidan ham tashvishlanmaydi.
Qolaversa, aktrisa ishtirok etadigan loyihalarni diqqat bilan tanlaydi. U shunday rejissor va ssenariy bilan ishlashi kerakki, suratga olish maydonida sodir bo‘layotgan voqealar uni boyitishga xizmat qilishi lozim. Shu bilan birga, Totu bir vaqtning o‘zida bir nechta kartinada ishtirok etishni yomon ko‘radi. U ishni boshlaganida rolga to‘liq sho‘ng‘ib ketgani uchun bir filmdan ikkinchisiga o‘ta olmaydi.
Odri filmning budjeti, uning ixtiyoridagi resurslar yoki filmning qanchalik mashhur bo‘lishi bilan umuman qiziqmaydi. U o‘ziga ma’qul kelgan loyihalarda ishtirok etadi va bu aktrisa tanlovining asosiy mezonidir.
“Koko do Shanel” filmi Odri Totuga haqiqiy personajni o‘ynash imkoniyatini berdi. Bu kabi rol uning uchun birinchi tajriba edi. Aktrisa loyihaga tayyorgarlik ko‘rish chog‘ida Shanelning hayoti haqida ko‘p narsalarni bilib olganini ma’lum qildi. Biroq yo‘l boshida, dunyoga mashhur bo‘lishidan oldin film qahramoni – Gabrielni tushunish aktrisaga qiyin bo‘ldi. Totuni Shanel hech qanday ma’lumotga ega bo‘lmagan qiz sifatida o‘zining moda imperiyasini yaratishga muvaffaq bo‘lgani chin dildan hayratda qoldirdi. Odri, shuningdek, Gabrielning eng ko‘p jalb qiladigan narsasi uning modaga sodiqligi emas, balki uning ruhi va shaxsiyati ekanligini ta’kidlab o‘tgan.
Odri Totuning aytishicha, uning imkoniyatlari va o‘ziga bo‘lgan ishonchi yetarlicha bo‘lmaydi. Suratga olish maydonida ishonchsizlikni rejissor yordamida yengadi. Shu bilan birga, u o‘z ishining natijasiga erishadi. U har doim o‘z oldiga qo‘yilgan vazifani a’lo darajada uddalashiga ishonadi va agar u kamchilikka yo‘l qo‘ysa ham, o‘zini koyimaydi.
Odrining so‘zlariga ko‘ra, ishonchsizlik aktrisaning odamlar u haqida qanday fikrda ekanligini bilmasligi bilan bog‘liq. Albatta, uni sevadigan va qadrlaydiganlar borligini biladi, ammo qolganlari uning uchun sir.
Gollivud bilan aloqa
Odri Totu Gollivudda unchalik ham mashhur emas, uni filmlarda kamdan kam hollarda ko‘rish mumkin. Buning sababi faqat bitta: aktrisa o‘z joyini Parij deb hisoblaydi. U fransuz kinosining bir qismi bo‘lishni juda yaxshi ko‘radi. Odri, shuningdek, qurbonliksiz yaxshi rol olish qiyinligini juda yaxshi biladi, ayniqsa, yosh 40 dan oshgan bo‘lsa. Ammo u bu haqda tashvishlanmaydi va okeanorti mamlakatidan taklif tushsa, chin dildan xursand bo‘ladi. Shu bilan birga, Totu rol uchun hech kimning orqasidan yugurmaydi ham.
Kinodan tashqaridagi hayot va xobbi
Odri yiliga bir nechta loyihalarda ishtirok etadi. U ish bilan band emas, bu yondashuv bilan u hech narsa yo‘qotmaydi. Aktrisaning aytishicha, kinodan tashqarida u ma’lum rejimda hayot kechiradi va u hech qachon zerikmaydi. Aktrisa sayohat qilishni, suratga olishni, yozishni va rasm chizishni yaxshi ko‘radi. Totu uchun haqiqiy hayotdan mosuvo bo‘lmaslik juda muhim, shuning uchun u ko‘p vaqtini oilasi va do‘stlari bilan o‘tkazadi.
Odri maktabda o‘qib yurganida yelkanli sportni yaxshi ko‘radigan o‘qituvchisi bir marta bolalarga suzishni ko‘rsatgan edi. Shu paytdan boshlab bo‘lajak aktrisa bu kasbni sevib qolgan. Odri yaxshi dengizchi va dunyo bo‘ylab sayohat qilishni orzu qiladi. Ammo unda buni uddalay olishiga shubha bor. Aktrisa buning uchun erkak bo‘lib tug‘ilish kerak, deb hisoblaydi. Chunki u yelkanli qayiqdagi barcha ishlarni bajarish uchun yetarli jismoniy kuchga ega emas. Shuningdek, uning qayig‘i juda kichik bo‘lib, u bilan uzoq sayohatga chiqib bo‘lmaydi.
2017-yilda Monmajur abbatligida fotoko‘rgazma ochildi va Odri Totu tomoshabinlar oldida suratkash sifatida paydo bo‘ldi. Aktrisaning bolaligidan suratga olishga ishtiyoqi baland: 11 yoshidayoq uning yaxshigina kamerasi bor edi. Biroq kino olamida ishlash uning sevimli mashg‘ulotini ikkinchi darajaga tushirib qo‘ydi. Ko‘rgazmada 300 ta fotosurat namoyish etilgan bo‘lib, ularning ba’zilarida bir paytlar Odri bilan suhbatlashgan jurnalistlar tasvirlangan. Lekin kadrlarning aksariyati avtoportretlardir.
Odrining so‘zlariga ko‘ra, u o‘z ishini ommaga ko‘rsatishga qaror qilgan, chunki u faqat aktrisa sifatida cheklanib qolishni istamaydi. U rol o‘ynashdan tashqari, yana nimalar qo‘lidan kelishini ko‘rsatmoqchi bo‘lgan.
Moda olami
Odri Totu fransuz hashamatining ramzi hisoblanganiga qaramay, uni yirik brendlarning elchisi bo‘lishga taklif qilishadi, ammo aktrisaning o‘zi tendensiyalarga amal qilmaydi va moda jurnallarini faqat sartaroshxonada o‘tirgandagina o‘qiydi. U chiroyli ko‘ylaklarni ko‘rganda, chin dildan hayratda qoladi va hatto ularni san’at asari deb biladi. U o‘zi uchun tasvirlarni tanlashda amaliy nuqtayi nazarni inobatga oladi. Odri xarid qilishni yomon ko‘radi va faqat zarurat tug‘ilganda xarid qilishga boradi. Shu bilan birga, u tendensiyalarga e’tibor bermasdan, o‘ziga yoqadigan narsani tanlaydi.
Aktrisa o‘zini mukammal fransuz namunasi deb hisoblamaydi, lekin u, birinchi navbatda, kiyim uslubni aks ettirishi kerakligiga e’tibor qaratadi. Shuning uchun u hech qachon stilistlar bilan ishlamaydi va barcha premyeralarga takrorlanmas obrazda tashrif buyuradi. Va agar uning qiyofasi tanqid qilinsa, Odri buni saboq sifatida qabul qiladi, chunki har qanday tirik inson xatolarga yo‘l qo‘yishi tabiiy.
Izoh (0)