2001 йилда «Амели» фильми экранларда намойиш этилгач, Одри Тоту дунё бўйлаб миллионлаб одамларнинг севимли актрисасига айланди. Аста-секин актрисага тақлид қилиш ва унинг ташқи кўринишини такрорлайдиганлар сони ортиб борди. Шунингдек, одамлар бу ғайриоддий актриса ҳақида имкон қадар кўпроқ маълумотга эга бўлишга ҳаракат қилди. Ўша вақтдан бошлаб Одри француз услубининг тимсолига айланди. Бироқ сайёранинг турли бурчакларидан мухлислар қалбини забт этган актриса гўёки бирдан уларнинг кўз ўнгида ғойиб бўлди. Аслида бу унчалик ҳам тўғри эмасди: Одри қаттиқ меҳнат қилди, 26 та фильмда рол ижро этди, уларнинг орасида «Да Винчи коди» ва «Коко до Шанел» картиналари ҳам мавжуд.
Карьеранинг бошланиши
Одри Тоту 1976 йил 9 августда Франциянинг кичик Бомон шаҳрида туғилган, болалиги эса Монлюсон шаҳрида ўтган. Унинг отаси Бернард Тоту тиш шифокори, онаси Эвелин Тоту эса Монлюсон агломарециясининг вице-президенти вазифасида фаолият юритган. Улар қизини актриса Одри Хепбёрн шарафига номлаган.
Кичкинтой Одри Эйфель минорасига жуда қизиқар эди. У минора қанчалик баланд эканлигини тушунишга ҳаракат қиларди. Тоту бу масалада ҳатто ота-онасини ақлдан оздирганини ҳам айтиб ўтган: у шаҳардаги барча биноларни кўрсатар ва «Наҳотки минора ҳақиқатан ҳам бу бинодан баланд бўлса? Шундай бўлса, қанча баланд?» каби саволлар берарди.
Кўнгилочар масканларни Одри то ўсмирлик ёшига қадар ёқтирмади. У кўпроқ ҳайвонларга ғамхўрлик қилишни ва одамларга ёрдам беришни хоҳлади. Кино саноатига қизиқишнинг туғилиши уни ҳафтада бир неча марта кинотеатрга олиб борган онаси туфайли бошланди. Шундай қилиб, Одри барча янгиликлардан хабардор бўларди. Аммо ўшанда ҳам у актриса бўлмоқчи эмасди, лекин унинг эътиборини фильм ва спектакллар саҳналаштириш билан боғлиқ бўлган ҳамма нарса ўзига тортди: саҳна, либос, декорация...
Шунингдек, дугонасининг таклифи билан актрисаликка қизиқиб қолди. Кейинчалик, унинг бакалавр даражасини муваффақиятли тугатганлиги шарафига ота-онаси унга Париждаги нуфузли театр мактабида 2 ҳафталик ёзги курсни тақдим этди. У ерда Одрига қолиш таклифи билдирилди. Бундан ташқари, Тоту Париж Сорбонна университетида адабиёт бўйича таҳсил олди. Аввалига ота-она қизининг актриса бўлишига шубҳа қилди, лекин театр мактабининг ўқитувчилари уни қобилиятли талаба сифатида мақтади, шундан кейин улар қизининг танловини қўллаб-қувватлади.
Амели роли
Фильм ижодкорлари томонидан ушбу рол дастлаб Ванесса Парадисга таклиф қилинган, бироқ у рад жавобини берган. Одри Тоту режиссёрнинг таклифига биноан синовдан ўтган ва Амели Пулен ролини ижро этиш унга насиб қилган.
Одри фильм намойишидан кейинги эришилган муваффақиятни бўронга қиёслайди. Актрисанинг сўзларига кўра, унинг ўзи ҳеч қанақасига ўзгармаган, атрофидагилари ҳақида эса гапира олмайди. Аммо одамлар унга оддий, аввалгидек қарашни тўхтатган ва бу Одри учун жуда ғалати туюлган.
Амели образи Тотуни бутун дунёга машҳур қилди ва янги мода йўналишига асос солди. Премьерадан бир неча йил ўтган бўлса ҳам, қизлар сартарошдан «Амели» комедиясидаги французча боб каре турмагини сўрайди.
Бутун дунё бўйлаб муваффақиятга эришгандан кейинги ҳаёт ва карьера
Одри Тоту ижтимоий тармоқлардан фойдаланмайди, у атайлаб бўлса-да, ҳар қандай ошкораликдан қочади. У ҳатто бир маротаба ҳаётининг тафсилотлари билан бўлишишдан кўра Ойга кўчишни афзал кўришини айтиб ўтган. Актрисанинг фикрича, интернетда ҳар ким ўз фикрига эга ва у бундан халос бўлишни хоҳлайди.
Одри интернетдаги фотосуратларнинг 90 фоизини ўз-ўзини реклама қилиш деб билади, шунингдек, уларда иштирок этишни ҳамда бренд бўлишни ҳам хоҳламайди. Ажабланарлиси шундаки, актриса ҳаттоки бир соатда ҳамма уни унутиб қўйишидан ҳам ташвишланмайди.
Қолаверса, актриса иштирок этадиган лойиҳаларни диққат билан танлайди. У шундай режиссёр ва сценарий билан ишлаши керакки, суратга олиш майдонида содир бўлаётган воқеалар уни бойитишга хизмат қилиши лозим. Шу билан бирга, Тоту бир вақтнинг ўзида бир нечта картинада иштирок этишни ёмон кўради. У ишни бошлаганида ролга тўлиқ шўнғиб кетгани учун бир фильмдан иккинчисига ўта олмайди.
Одри фильмнинг бюджети, унинг ихтиёридаги ресурслар ёки фильмнинг қанчалик машҳур бўлиши билан умуман қизиқмайди. У ўзига маъқул келган лойиҳаларда иштирок этади ва бу актриса танловининг асосий мезонидир.
«Коко до Шанел» фильми Одри Тотуга ҳақиқий персонажни ўйнаш имкониятини берди. Бу каби рол унинг учун биринчи тажриба эди. Актриса лойиҳага тайёргарлик кўриш чоғида Шанелнинг ҳаёти ҳақида кўп нарсаларни билиб олганини маълум қилди. Бироқ йўл бошида, дунёга машҳур бўлишидан олдин фильм қаҳрамони – Габриэлни тушуниш актрисага қийин бўлди. Тотуни Шанел ҳеч қандай маълумотга эга бўлмаган қиз сифатида ўзининг мода империясини яратишга муваффақ бўлгани чин дилдан ҳайратда қолдирди. Одри, шунингдек, Габриэлнинг энг кўп жалб қиладиган нарсаси унинг модага содиқлиги эмас, балки унинг руҳи ва шахсияти эканлигини таъкидлаб ўтган.
Одри Тотунинг айтишича, унинг имкониятлари ва ўзига бўлган ишончи етарлича бўлмайди. Суратга олиш майдонида ишончсизликни режиссёр ёрдамида енгади. Шу билан бирга, у ўз ишининг натижасига эришади. У ҳар доим ўз олдига қўйилган вазифани аъло даражада уддалашига ишонади ва агар у камчиликка йўл қўйса ҳам, ўзини койимайди.
Одрининг сўзларига кўра, ишончсизлик актрисанинг одамлар у ҳақида қандай фикрда эканлигини билмаслиги билан боғлиқ. Албатта, уни севадиган ва қадрлайдиганлар борлигини билади, аммо қолганлари унинг учун сир.
Голливуд билан алоқа
Одри Тоту Голливудда унчалик ҳам машҳур эмас, уни фильмларда камдан кам ҳолларда кўриш мумкин. Бунинг сабаби фақат битта: актриса ўз жойини Париж деб ҳисоблайди. У француз киносининг бир қисми бўлишни жуда яхши кўради. Одри, шунингдек, қурбонликсиз яхши рол олиш қийинлигини жуда яхши билади, айниқса, ёш 40 дан ошган бўлса. Аммо у бу ҳақда ташвишланмайди ва океанорти мамлакатидан таклиф тушса, чин дилдан хурсанд бўлади. Шу билан бирга, Тоту рол учун ҳеч кимнинг орқасидан югурмайди ҳам.
Кинодан ташқаридаги ҳаёт ва хобби
Одри йилига бир нечта лойиҳаларда иштирок этади. У иш билан банд эмас, бу ёндашув билан у ҳеч нарса йўқотмайди. Актрисанинг айтишича, кинодан ташқарида у маълум режимда ҳаёт кечиради ва у ҳеч қачон зерикмайди. Актриса саёҳат қилишни, суратга олишни, ёзишни ва расм чизишни яхши кўради. Тоту учун ҳақиқий ҳаётдан мосуво бўлмаслик жуда муҳим, шунинг учун у кўп вақтини оиласи ва дўстлари билан ўтказади.
Одри мактабда ўқиб юрганида елканли спортни яхши кўрадиган ўқитувчиси бир марта болаларга сузишни кўрсатган эди. Шу пайтдан бошлаб бўлажак актриса бу касбни севиб қолган. Одри яхши денгизчи ва дунё бўйлаб саёҳат қилишни орзу қилади. Аммо унда буни уддалай олишига шубҳа бор. Актриса бунинг учун эркак бўлиб туғилиш керак, деб ҳисоблайди. Чунки у елканли қайиқдаги барча ишларни бажариш учун етарли жисмоний кучга эга эмас. Шунингдек, унинг қайиғи жуда кичик бўлиб, у билан узоқ саёҳатга чиқиб бўлмайди.
2017 йилда Монмажур аббатлигида фотокўргазма очилди ва Одри Тоту томошабинлар олдида сураткаш сифатида пайдо бўлди. Актрисанинг болалигидан суратга олишга иштиёқи баланд: 11 ёшидаёқ унинг яхшигина камераси бор эди. Бироқ кино оламида ишлаш унинг севимли машғулотини иккинчи даражага тушириб қўйди. Кўргазмада 300 та фотосурат намойиш этилган бўлиб, уларнинг баъзиларида бир пайтлар Одри билан суҳбатлашган журналистлар тасвирланган. Лекин кадрларнинг аксарияти автопортретлардир.
Одрининг сўзларига кўра, у ўз ишини оммага кўрсатишга қарор қилган, чунки у фақат актриса сифатида чекланиб қолишни истамайди. У рол ўйнашдан ташқари, яна нималар қўлидан келишини кўрсатмоқчи бўлган.
Мода олами
Одри Тоту француз ҳашаматининг рамзи ҳисобланганига қарамай, уни йирик брендларнинг элчиси бўлишга таклиф қилишади, аммо актрисанинг ўзи тенденцияларга амал қилмайди ва мода журналларини фақат сартарошхонада ўтиргандагина ўқийди. У чиройли кўйлакларни кўрганда, чин дилдан ҳайратда қолади ва ҳатто уларни санъат асари деб билади. У ўзи учун тасвирларни танлашда амалий нуқтаи назарни инобатга олади. Одри харид қилишни ёмон кўради ва фақат зарурат туғилганда харид қилишга боради. Шу билан бирга, у тенденцияларга эътибор бермасдан, ўзига ёқадиган нарсани танлайди.
Актриса ўзини мукаммал француз намунаси деб ҳисобламайди, лекин у, биринчи навбатда, кийим услубни акс эттириши кераклигига эътибор қаратади. Шунинг учун у ҳеч қачон стилистлар билан ишламайди ва барча премьераларга такрорланмас образда ташриф буюради. Ва агар унинг қиёфаси танқид қилинса, Одри буни сабоқ сифатида қабул қилади, чунки ҳар қандай тирик инсон хатоларга йўл қўйиши табиий.
Изоҳ (0)